HIZPIDEAK

Sistema itotzeko arriskua

Amagoia Mujika Tolaretxipi -

2019ko abenduak 12
Gipuzkoako zahar etxeetako langileen greba; 150 egun, lan baldintza duinen aldeko protestan, instituzioek eta patronalek gutxietsitako borroka feministan; emakume izateagatik eta zaintza arloan lan egiteagatik enpresari eta politikariengandik jasan duten ikusezintasunari aurre eginez, hor, kalean, herriz herri, presente. Gatazka bezain aspaldikoa baita arazoa ezkutuan gordetzeko ahalegina, zaintzak emakumeen dohain omen den borondateari lotuta segitzeko saiakera, mendeetan izan den bezala, per saecula saeculorum.

Diru publikoz enpresa pribatuek kudeatzen duten ereduaren parte da grebalarion prekarizazioa, bete ezin diren ratioen eta behar bezala zaindu ezin diren erabiltzaile kopuruaren arabera antolatutako sistema. «Bidegabea eta jasangaitza», haien ustez, negozio biribila, euren lanari esker dirutza irabazten duten enpresentzat.

Gipuzkoako Diputazioak, ordea, greba egunetan gutxieneko zerbitzuak %80ra igota eman nahi dio irtenbidea arazoari, grebarako eskubidea urratuta ere —erabiltzailea babesteko—, eta ez dago prest emakumeen «eskari guztiak» onartzeko, luzera «sistema ito egingo» litzatekeelako. Alegia, emakumeen bizkar aberasten den sistema.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna