Nazioarteko krisia

Emmanuel Macronek Amazonian gertatzen ari dena Miarritzeko eztabaida mahaira ekarri nahi du, deforestazioari «nazioarteko krisia» deritzolako. Baina baso soiltzea, besteak beste, abeltzaintzaren eta soja landaketaren ondorioa da. Europan eta AEBetan salduko den haragia ateratzen da sojaz elikatzen diren behi horietatik, eta aurreikuspenak ez dira batere lasaigarriak: izan ere, horrela jarraituz gero, haragi kontsumoa bikoiztu egingo da munduan datozen hogei urteetan. Jair Bolsonarok argi berdea emana die, nekazaritza eta abeltzaintza lobbyei ez ezik, baita legez kanpo basoak ustiatzen dituztenei ere —Frantziako eta Espainiako enpresak tartean—, edota meatzaritza eta proiektu hidraulikoei.

Ideia ona izan du Macronek gaia bere bilerara ekartzerakoan, mundua begira daukanean. Baina hartuko al dute neurririk deforestazioaren atzean dauden multinazionalen jarduera gerarazteko? Macronek Bolsonarori ohartarazi dio jarrera aldatzen ez badu arriskuan dagoela Mercosurrek eta Europako Batasunak hartu-eman ekonomikoak hobetzeko akordioa. Baina inork itzali al du deforestazioa gerarazteko motor ekonomikoa? Mugarik gabe ekoitzi eta kontsumitzekoa? Ikusi beharko da non geratzen diren ohartarazpenak, G7ak berea eman duenean. Macron espezialista baita marketinean.