Propaganda

Propaganda tresna ezin hobeak dira jaiegunak: halako data jaiegun izendatuz gero, nahi gabe ere herritar guztiak enteratuko dira egun horretan zer gertatu zen. Eusko Jaurlaritza lehenago ere saiatu zen, Estatutuaren Eguna jai dekretatuta, eta orain Elkanoren Eguna inauguratuko dute, 2022ko irailaren 6an.

Inozoegia litzateke pentsatzea herritarren atxikimendua lortzeko izendatzen direla jai halako data jakinak. Egun jakin bat jai izateak ez du atxikimendu akritikoa sortzen berez, eta hor daude egutegiko egun gorri horiek, frogatzeko: San Ignazio, Hispanitatearen Eguna, Espainiako Konstituzioaren Eguna, Aste Santua... Jaiegun horiek ez dituzte herritarrak katolikoago edo espainiarrago egin, eta Elkanoren Egunak ere ez du atxikimendu ezohiko bat sortuko, noski. Baina herritarrengana iristeko modu bat dira jaiegunak, sare sozial eta hedabide guztiak baino eraginkorragoak seguru asko, eta tresna hori baliatu du Jaurlaritzak. Eta pena da, mundua Black Lives Matter mugimenduaren aldarriei eta kolonizazioaren izen handien berrinterpretazioari begira dagoen honetan, Euskal Herriko garai bateko konkistatzaileek egindakoak berrikusteko aukera iritsi den honetan, Espainiako Koroaren zerbitzura egindako espedizio kolonial bat Cadizera iritsi zen eguna ospatu behar izatea autonomierkidegotarrek. Propaganda egitea bazen helburua, ez ziren, ba, aukerak falta. Esaterako, hor ausazko bat: Zirgarien Eguna. Meritu gutxiago egin ote zuten?