Albistea entzun

HIZPIDEAK

Barbaroen inbasioak

Mikel Rodriguez -

2021eko azaroak 10 - @MikelR28

EB Europako Batasunak Polonia eta Bielorrusia arteko mugan du orain migrazio auziko puntu gatazkatsua. Duela pare bat hilabete Ursula von der Leyen Europako Batzordeko presidenteak adierazi zuen Bielorrusia «eraso hibrido bat» egiten ari zela Asiako eta Afrikako migratzaileei EBn sartzeko bidea erraztuta. Orain, NATOk ere erran du Minsk «taktika hibridoa» erabiltzen ari dela. Baina zer dela-eta mintzatu beharko litzateke aliantza militar bat migrazio auzi bati buruz?

Limes-a barbaroen inbasioetatik defendatzen ari den Erromatar Inperioa balitz bezala portatzen da EB. Foederati-en politika bera ere imitatzen diola ematen du. Erromak, mugetan soldaduak eta hesiak paratzeaz gain, kanpoko herriak kontratatzen zituen inperiora inor sar ez zedin ardura zitezen. EBk Marokorekin, Libiarekin, Turkiarekin eta mugen inguruan dituen bertze zenbait estaturekin egin izan ditu halako akordioak, onura ekonomiko eta politikoen truke migratzaileei bidea ixteko. Baina, harrapakinaren beldurrak harrapariari adorea ematen dion bezala, estatu horiek jakin dute EBk immigrazioari dion neurrigabeko beldurra baliatzen, nahi dutenean Brusela estu hartzeko.

Soldaduak paratzeak, hesiak altxatzeak eta foederatia-k kontratatzeak, irtenbideak baino gehiago, buruhausteak eman dizkio EBri orain arte. Agian, hobe luke, barbaroek inbadituko balute bezala portatu beharrean, indarkeriatik eta bizi baldintza negargarrietatik ihesi doan jendea heldu dela ikustea, eta migrazio politikak horren arabera egitea.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...