Albistea entzun

HIZPIDEAK

Titanic

Mikel Rodriguez -

2021eko urtarrilak 28 - @MikelR28

Gizateriak inoiz ikusi gabeko sorkari bat zen Titanic ontzia. Erraldoia, bizkorra, deuseztaezina. Naturaren indarrik handienetako bat, hots, ozeanoa garaitzeko sortua. Mende bat baino luzaroagoan sortu duen lilurapena halakoa izan da, erran bailiteke Mendebaldeko kulturan bederen portaera anitzen esentzia biltzen duela. Handitasun eta sendotasun ustearen sinboloa, naturaren ezusteko elementu batek hondoratua. Duela urtebete eskas, errate baterako, Europako agintari anitz lasaitasun mezuak ematen ari zirenean bezala, errateko osasun sistemak guztiz prestatuta zeudela Txinatik zabaltzen hasi zen birus ezezagun hari aurre egiteko. Baina iceberga bidean agertu zen.

Pandemia fase bikoitz batean sartu da orain: kutsatzeek erritmo handian segitzen dute, baina badago txertoa. Hala ere, Titanic-en itzala luzea da oraindik. Titanic-ek ez zituen bidaiari guztiak salbatzeko adina txalupa, eta zaurgarrientzat zeuzkatenei eman zieten lehentasuna horietan sartzeko. Protokoloa argia zen. Baina ontzia hiru klasetan banatua zegoen, eta lehen klasekoek bertzeek baino eragin handiagoa zuten zerrendaren kontrolean. Zenbatek egin dute jauzi SARS-CoV-2 birusetik immunizatzeko txalupara, zegokien baino lehenago, beren bidaia txartelean paratzen zuena baliatuta? Bidaiari horien gainean hasi eta bukatzen da errua, edo klaseen arteko banaketa horrek badu oinarrian berrikusi beharreko arazo zabalagoren bat?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...