Albistea entzun

HIZPIDEAK

Pazientzia

Mikel P. Ansa -

2018ko uztailak 5 - @peruarenaansa

Ez da aldaketako gobernuen lehen krisia izan, eta, orain artekoak ikusita, seguru asko ez da azkena izango. Iruñeko Udalean, Aranzadik eta Ezkerrak sarritan markatu dituzte diferentziak alkatearen taldeak hartutako erabaki batzuekin, eta lehenago ere zatitzekotan egon izan da udal gobernua. Baina orain arte akordio programatikoari eustea izan da irtenbidea —krisiak suertatu izan direnean hori bihurtu da heldulekua, udalean nahiz Nafarroako Gobernuan—, eta lortu izan dute aurrera jarraitzea. Orain arte bai, baina akordio programatikoa ez da aski izan azkeneko krisi hau gainditzeko, eta Iruñeko Udaleko gobernua zatitu egin da. Alderdi bakoitzeko jarraitzaileek izango dituzte beren argudioak fedezko ekintzei eusteko, eta nork bere santuari kandelak pizteko: batzuek esango dizute haiek autoritario batzuk direla eta ez dituztela gutxiengoen iritziak aintzat hartzen, eta besteek erantzungo dizute haiek ez dutela ezer negoziatzeko asmorik edukitzen, eta gutxiengo izanik ere beren iritziak inposatzea bilatzen dutela.

Hiru urte joan dira aldaketaren gobernuak sortu zirenetik Nafarroan. Ezertan izatekotan, mezu honetan bat egin dute guztiek: aldaketari erro sakonak eman behar zaizkio, pazientzia behar da, atzeraezinak izango diren urratsak egiteko. Orain, ikusita urak zein nahasita datozen eta bozak urtebete eskasean izango direla eta berriz ere elkarren beharra izango dutela noski, pazientzia eta zerbait gehiago beharko dute urratuak sendatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...