HIZPIDEAK

Skolae

Jakes Goikoetxea -

2019ko ekainak 7
Ez da ez txantxa bat, ez duela zenbait hamarkadatako edo mendetako albiste bat, ezta gobernu atzerakoiren batek gidatutako herrialde urrun bateko berria ere. Atzoko albistea da, Nafarroakoa bertakoa, Euskal Herrikoa: Nafarroako Justizia Auzitegi Nagusiak deklaratzera deitu ditu Skolae hezkidetza programa prestatu zuten bost aditu eta irakasleak trebatzen ari diren beste bost. Lekuko gisa deitu ditu, baina deklaratzera joan beharko dute, epaitegi batera. Zergatik? Ikasleen artean berdintasuna eta indarkeria sexistaren aurkako kontzientzia bultzatu nahi dituen programa batean parte hartzeagatik. Garai berrietako Inkisizio zaharra.

Plataforma Nacional 18M taldeak eta guraso talde batek jarri zuten Skolaeren kontrako salaketa. Eta auzitegiak tramiterako onartu zuen. Eskandalagarria. Harrigarria. Nafarroan ez hainbeste, erregimen politikoak eta mediatikoak gaia zenbat eta nola hauspotu duten ikusita, erregimenaren eta aldaketaren arteko lehian ikurretako bat bihurtuz. Ez da kasualitatea hezkuntza gaia izatea, hezkuntza politiketan argi eta garbi islatzen baita zer gizarte eredu babesten duen gobernu bakoitzak, eta hezkuntza izaten baita lehia politikoaren eremu gordinenetakoa.

UPNk gobernatzen badu, bertan behera utziko du Skolae programa, jakina. Bost axola PSOEri eta Pedro Sanchezi. Azken finean, Espainiako Gobernua osatu ahal izateko babes faltan, bost axola baitzaizkie Nafarroa eta nafarrak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna