Khamenei aiatolak batasunerako deia egin die herrialde arabiarrei

Aiatolak salatu du itun nuklearreko EBko kideak ez direla konfiantzazkoak, eta negoziazioak iruzurrez beteta daudela. Ohartarazi du balitekeela Iranen borroka bere mugetatik harago joatea
Ali Khamenei aiatola errezoa zuzentzen, atzo, Teheranen.
Ali Khamenei aiatola errezoa zuzentzen, atzo, Teheranen. EFE Tamaina handiagoan ikusi

Jone Bastida Alzuru -

2020ko urtarrilak 18

Gatazka zurrunbilo batean dago Iran. Qassem Soleimani Guardia Iraultzailearen jeneralaren hilketak askaezina dirudien mataza bat sortu du. Bada, garai nahaspilatsu horren erdian, Ali Khamenei aiatolak zuzendu zuen atzo ostiraletako errezoa —aurreneko aldia da 2012. urtetik—, eta herrialde arabiarrei «batasunerako» deia egin zien. Gogor kritikatu zituen AEBak, eta salatu zuen «desadostasunak» sortzen saiatu direla, baita «eskualdeko herrialdeak eta haien aberastasunak kontrolatzen ere». Horrez gain, esan zuen balitekeela Iranen borroka «bere mugetatik harago» joatea. Aiatolaren arabera, Teheranek erresistentzia «babesten» du, eta uko egiten dio «amore emateari». Jarrera hori salatu zuen Brian Hook AEBek Iranen duten ordezkariak, eta ohartarazi zuen Teheran are gehiago «bakartuko» dela mehatxuekin jarraitzen duen bitartean .

Teheranen eta Washingtonen arteko tentsioak asko tenkatu dira Soleimaniren hilketaren ondorioz, baina Ukrainako hegazkinen aurkako erasoak barne krisia ere eragin du Iranen, eta azken egunotan indartu egin dira gobernuaren aurkako protestak. Egoera are gehiago katramilatu da, gainera, itun nuklearreko EB Europako Batasuneko estatu kideek Iran zigorrekin mehatxatu dutenetik. Alemaniak, Frantziak eta Erresuma Batuak martxan jarri dute akordio nuklearreko sinatzaileen arteko eztabaidak konpontzeko mekanismoa, Iranek «beste irtenbiderik» utzi ez diela argudiatuta; horrekin, baliteke NBE Nazio Batuen Erakundeak zigorrak berrezartzea. Atzo, Khameneik jarrera hori gaitzetsi zuen, eta mesfidantza adierazi: «Ez dira konfiantzazkoak. Iranekin egin dituzten negoziazioak iruzurrez beteta daude». Gaineratu zuen ez direla «makurtuko» haien exijentzien aurrean. Itun nuklearra 2015ean izenpetu zuten Iranek, AEBek, Alemaniak, Erresuma Batuak, Errusiak, Frantziak eta Txinak. Horren arabera, Iranek onartu zuen programa nuklearra helburu zibilekin eta nazioarteak gainbegiratuta egitea, eta beste herrialdeek zigorrak kendu zizkioten.

Iragan urtean, Iranek iragarri zuen hitzarmena progresiboki utziko zuela, eta muga batzuk ez errespetatzeko erabakia hartu zuen. Hain zuzen, ostegunean Hasan Rohani Irango presidenteak azaldu zuen akordio nuklearra sinatu aurretik baino gehiago aberasten dutela uranioa egun. Rohainik Europako sinatzaileei leporatu zien ez betetzea itunean hartutako konpromisoak, eta Washingtonen «ildo beretik» aritzea. «Beste aldeek beraien engaiamendua murrizten badute, guk ere hala egingo dugu», azpimarratu zuen.

Errusia kezkatuta agertu da akordio nuklearra jasaten ari den krisiaren aurrean, eta EBko kideekin «berehala» batzar bat egiteko beharra adierazi du. Sergei Lavrov Atzerri ministroak dio horiek eginiko urratsa «bira arriskutsua» izan dela, eta iritzi dio akordioarekin egiten ari direna ez dela «aproposa».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

 ©BERRIA

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan. Gaur, koronabirusaren larritasuna.

Azkoien izan zen halako neurriak hartu zituzten lehen herria. ©Idoia Zabaleta / Foku

San Adrianen murrizketak ezarriko dituzte, bihar gauerditik aurrera

Joxerra Senar

Beste hiru herritan aurretik egin bezala, mugimendua mugatu egingo da eta saltokietan zein ostatuetan edukiera erdira murriztuko da. Ostatuek 22:00etarako itxi beharko dute.

PCR probak, Gurutzetako ospitalean. ©Luis Jauregialtzo

Ia ehun kasu gutxiago atzeman dituzte egun bakarrean

Uxue Rey Gorraiz

Azken egunean, 608 kasu detektatu dituzte Hego Euskal Herrian. Positiboek behera egin dute Nafarroan, Bizkaian eta Araban; Gipuzkoan ugaritu egin dira.

Santos Indurain Osasun kontseilariaren agerraldia, artxiboko irudi batean. ©Jesus Diges, EFE

Nafarroako egoera «egonkortzen» ari dela esan du gobernuak

Uxue Rey Gorraiz

Azken egunean, 223 positibo atzeman dituzte foru erkidegoan. Kutsatuen kopuruak behera egin du bigarren egunez jarraian.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna