Parketxeak zain daude
Suedian sortu ziren Europako lehen natur parkeak: 1909a zen urtea, eta maiatzaren 24a eguna. Bederatzi parkeri eman zieten izendapena eta babesa, eta egun horretan ospatzen da 1999az geroztik urtero Europako Natur Parkeen Eguna. Lelo bat izaten du egunak, eta aurtengoak ere badu berea: Gure sustraien gainean eraiki. «Ideia da onartzea berdeguneak planetaren parte direla, ekosistema global horren parte. Horiek ematen digute babesa eta sostengua, eta babestu eta errespetatu egin behar ditugu. Eta horiek aintzat hartuta eraiki behar dugu etorkizuna, eta ez albo batera utzita, orain arte egin dugun bezala», azaldu dute antolatzaileek.
Europarc elkarteak izendatu zuen maiatzaren 24a Europako Natur Parkeen Eguna. 1973an sortu zen, eta 40 herrialdek osatzen dute. Gaur egun, 400 natur parke daude Europan, eta 120.000 babes eremu baino gehiago. «Natur parkeak, biodibertsitatea eta balio kulturalak gordetzeaz gain, gizakiarentzat estrategikoak diren ingurumen zerbitzuen gordailuak ere badira: aldaketa globalaren ondorioak ezagutzeko lurraldeak, laborategi zientifikoak, eta gizartearen gozamenerako eta ongizaterako espazioak», aldarrikatu dute elkartekoek.
Asteazkena zen natur parkeen eguna, baina asteburura begira antolatu dituzte hainbat parketxek ekitaldi bereziak. Gipuzkoako Parketxe Sarea fundazioak, esaterako, «egun berezi horri merezi duen garrantzia emateko», orientazio jolasak antolatu ditu Gipuzkoako lau natur parketan. Familian zein taldean egiteko moduko jarduerak dira, eta askotariko gaien inguruan atondu dituzte. Intxisuak aukeratu dituzte Arditurrin (Oiartzun); landaretzaren inguruan ariko dira Iturraranen (Aia); mitologia aztertuko dute Barandiaran museoan (Ataun); basoari buruz ariko dira Anduetzan (Zegama); eta animaliak ezagutuko dituzte Arantzazun (Oñati).
Jolas horietan parte hartzen dutenek natur ondareari buruzko galderak erantzun beharko dituzte ibilbidean zehar aurrera egin ahal izateko, eta, bide batez, orientazioaren oinarrizko ezagutza bereganatuko dute. Familia edo talde guztiek opari bat jasoko dute bukaeran, eta, natur parkeen eguna ospatzen dela-eta, jarduera horiek guztiak doakoak izango dira. Iturrarangoa gaur izango da, eta beste guztiak bihar. 11:00etatik aurrera egingo dira denak.
Natur Parkeen Eguna
Gaur eta bihar, Gipuzkoako zenbait natur parketan, 11:00etan.Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
