Egun osoko festa egingo dute, goizean goizetik. Herriko abeltzainen ganadu erakusketa jarriko dute frontoi zaharrean, 09:00etan, eta Euskal Herri osotik joandako ekoizleen produktuak ikusi, dastatu eta erosteko aukera izango da. Horrez gain, lehen sektorea gehiago ezagutzeko, garai batean zein gaur egun erabiltzen dituzten tresnak eta makinak jarriko dituzte ikusgai areto futboleko zelaian.
Eguerdian, txahal pintxoak dastatzeko aukera emango dute; inguru horretan, 12:00etan, artaldea pasatuko da herrigunetik. Horrez gain, herri kirolen erakustaldia egingo dute Txomenamen. Ondoren, bazkaria egingo dute udaletxe zaharreko arkupeetan, 14:30ean.
Hegoaldeko 40 onenak
Euskal Herriko Gazta Txapelketan, berriz, Nafarroako, Arabako, Bizkaiko eta Gipuzkoako 40 gaztagile lehiatuko dira: lurralde bakoitzeko hamar onenak, hain zuzen ere. Idiazabal sor-markako dastatzaile ofizialek ebatziko dute zein den guztietan onena. Halere, festara joaten direnek izango dute gazta horiek dastatzeko aukera, baita epaitzekoa ere: sari berezi bat emango diote jendeak aukeratutako gaztari.
Gazta sakonago ezagutzeko aukera ere izango da. Izan ere, Gaztaren Interpretazio Zentroa bisita daiteke. Egun osoan egongo da zabalik, 11:00etatik 14:00etara eta 16:00etatik 19:00etara.
«Baserritarren lanaren eta bizimoduaren erakusleiho izateko asmoz» antolatu dute jaia, Jabier Jauregi Idiazabalgo lehenengo sektorearen dinamizatzailearen esanetan. Horren harira, lehen sektorearen garrantzia azpimarratu du Jauregik: «Gure larreak eta mendiak dauden bezala mantentzeko behar-beharrezkoa da lehenengo sektorean aritzen direnen lana, eta horretaz jabearazi nahi ditugu herritar guztiak».
Abeltzaintzak eta artzaintzak ingurumenari ez ezik gizarte osoari on egiten diotela esan nahi dute antolatzaileek. Horregatik, garrantzitsutzat dute egiten duten lana ezagutaraztea, jendea haiek egiten duten lanaren balioaz jabetzeko.
