Urteurrenen jardunaldiak izanen dira aurtengoak. Izan ere, aurten 50 urte betetzen ditu Volatin ordenak, eta 25. aldiz antolatuko ditu jardunaldiak. Egunik berezienetako bat ohorezko kideak omentzeko eguna da. Perezek gogorarazi du aurten lehenbiziko aldiz emakumeak izanen direla: Teresa Perales kirolari elbarria eta Elena Arzak sukaldaria. «Barazkien pregoilari eta defendatzaile izendatuko ditugu», azaldu du ordenako idazkariak.
Denetariko dastatzeak izaten dira jardunaldietan, «herri prezioetan», Perezek azaldu duenez. Horrek erakartzen du gehien jendea: zainzuriak, orburuak, olioa, ardoa... Dena den, bada Volatin ordenak nabarmendu duen beste jarduera bat: Nekazaritzako Elikagaien Sektorearen Lehenbiziko Bilkura. Gaur izanen da, goiz osoan, Bardearen Komunitatearen egoitzan. «Sektorean garrantzitsuak diren Erriberako enpresak han izanen dira, eta haien produktuak, ekoizpenak eta lana erakutsiko dituzte. Horrekin batera, hitzaldi teknikoak izanen dira, zona honetan oraindik ezezaguna den nekazaritzako elikagaien industria ezagutarazteko».
Perezen aburuz, barazkien aldeko egitasmoek garrantzi handia dute, Erriberako «identitate ikur» direlako. «Barazkien garrantzia ezagutarazi beharra dago, eta gure herriaren oinarri diren enpresak ezagutarazi behar dira, baita lehenbiziko sektorekoak ere. Inguratzen gaituena goratzen ari gara, azken finean». Horretaz gainera, ohartarazi du egun horietan bisitari asko hartzen dituztela, eta uste du horrek bertako ekonomia bultzatzen duela. Are, bisitari kopuruak neurriak hartzera bultzatu zituen iaz: Erriberako gainerako herrietan ere jarduerak antolatzea.
Informazioa, eskura
Volatin ordenak karpa bat paratu du Tuteran, eta gaur irekiko dute, 10:00etan. Han, Erriberako produktuak dastatzeko parada ere izanen da, eta hitzaldiak eta tailerrak eginen dituzte. Volatin ordenako idazkariak hizpide izan ditu teknologia berriak ere: Aurten sakelakoetarako aplikazio bat sortu dute, jardunaldietarako baliagarri izanen dena. Fiestas de la Verdura deitzen da, eta gazteleraz baizik ez dago. Egitarauaz gainera, otorduetarako edo lotarako tokien informazioa ere biltzen du.