Nafarroako inbestidura saioa. Taldeen hitzartzeak

Navarra Suma. «PSNk etika eta morala gainditu ditu»

Esparzak kritikatu egin du sozialistek abertzaleekin akordioa lortu izana: esan du EH Bilduren abstentzioa «umiliazioa» dela ETAren biktimentzat
IÑIGO URIZ / FOKU

Iñaki Martinez Azpiroz -

2019ko abuztuak 2
«Traizioa». Hala deskribatu du Javier Esparza Navarra Suma koalizioko ordezkariak PSNk «nazionalistekin eta independentistekin» lortu duen akordioa. Maria Txibiteri leporatu dio EAJren eta EH Bilduren «salbatzailea» izatea: «Abertzaleek nahiago zaituzte zu, badakitelako Navarra Suma horma bat dela nazionalismoarentzat». EH Bilduren abstentzioa bilatu izana kritikatu du Esparzak bereziki, ETAren biktimentzat «umiliazioa» dela esanez: «PSNk etikaren eta moralaren mugak gainditu ditu».

EH Bildu izan da Esparzaren argudioa: «Gobernu berriaren sostengu nagusi bilakatuko da EH Bildu». Ohartarazi du «akats larria» dela ezkerreko abertzaleekin hitz egitea, hasieratik esan zutelako ez zutela gobernua «dohainik» emango: «Sozialistek esan zenuten EH Bildu mehatxua zela Nafarroarentzat, eta, orain, haren botoei esker lortuko duzue lehendakaritza». Esparzak Espainiako panoramarekin alderatu du Nafarroako egoera: «Sanchez ez da fio nazionalistekin; hemen, baina, independentista biolentoenekin egin duzue akordioa».

ETA ere askotan erabili du Esparzak EH Bilduren kontra egiteko, eta, hala, PSNren aurka. UPNren zinegotzi Tomas Caballero eta Jose Javier Mujika hartu ditu gogoan, ETAk hildakoak biak; hilketa horiek egin zituztenean ezker abertzaleak izandako «isiltasuna» gaitzetsi du, eta indarkeria hori gobernu berriarekin lotu du: «Orain, gobernu berriak [Arnaldo] Otegiren onespena du».

Txibitek bultzatu nahi duen gobernu programaren aurka ere gogor aritu da Navarra Sumaren ordezkaria: ohartarazi du azken legealdiaren «jarraipen hutsa» dela. Geroa Bairi, EH Bilduri, Ahal Dugu-ri eta Ezkerrari zuzendu zaie bereziki: «Nork esan zezakeen, gaur arte, hauteskundeetan lortutako emaitzei erreparatuta, laukoteak bere programari eutsiko zionik». UPNko buruaren arabera, Navarra Sumak eta PSNk, «konstituzionalistek», gehiengo zabala osa dezakete: 50 parlamentaritik 31. Horren alde egin du, aurrerapen soziala «konstituzionalisten eskutik» iritsi delakoan Nafarroara: ohartarazi du, ordea, gobernu berriko alderdiak horren aurka daudela.

Navarra Sumako parlamentariak txaloka lehertu dira Esparzak bere diskurtsoa amaitu duenean: denak zutitu dira. Unai Hualde parlamentuko presidentea giroa baretzen saiatu da: «Eutsi bozkarioari, mesedez».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna