Albistea entzun

Onenen artean onenak

Bihar hasiko da belar hockeyko munduko txapelketa. Terrassan eta Amsterdamen jokatuko da. Maialen Garcia donostiarrak podiumera igo nahi du bigarren aldiz.
Maialen Garcia partida batean, Espainiako selekzioarekin.
Maialen Garcia partida batean, Espainiako selekzioarekin. RFEH Tamaina handiagoan ikusi

Iñigo Lasa -

2022ko ekainak 30

Partida soil bat gai da kirolari bati duen onena ateratzeko. Txapelketa batek, berriz, duen baino pittin bat gehiago ateratzeko gaitasuna du. Munduko txapelketak, ordea, guztiz zukutzen du kirolaria. Hor daude onenak, eta denek erakutsi nahi izaten dute zergatik dauden hor. Bihartik uztailaren 17ra arte nor baino nor gehiago arituko dira belar hockeyko munduko selekziorik onenak, Terrassan (Herrialde Katalanak) eta Amsterdamen. Hamasei herrialdek hartuko dute parte, baina lau onenek bakarrik jokatuko dute uztaileko hirugarren asteburuan. Horra iritsi nahi du Maialen Garciak (Donostia, 1990), Espainiako selekzioarekin.

Txapelketan sua pizten aurrenekoak izango dira Garcia eta bere taldekideak. Kanadaren aurka lehiatuko dira bihar, 21:30ean. Ipar Amerikako selekzioarekin ez ezik, Argentinarekin eta Hego Korearekin neurtuko dituzte indarrak B multzoan. Donostiarraren ustez, beraien eta argentinarren artean egon beharko luke multzoko lidergoak: «Dena ondo badoa, argentinarrek eta guk erraz irabazi beharko genieke beste bi selekzioei. Argentina, baina, beste kontu bat da. Haien aurkako azken bi partidak 1-0 galdu ditugu. Gol bakarrarengatik irabazi digute, hala ere, eta horrek esan nahi du gertu gaudela».

Egutegiari erreparatuz gero, gustura dago neurketen errenkadarekin: «Erraza, zaila eta erraza», jarri ditu hurrenkeran. «Okerrik ezean, Kanadari erraz irabazi beharko genioke: ez dute guk bezain talde sendoa. Baina Ameriketako Estatu Batuak kanpoan utzi dituzte, eta gauzak ondo egin dituztelako izan da hori». Ondoren, txapelketako faboritoetako baten kontra: Argentina. «Lehena irabazten badugu, konfiantzaz iritsiko gara norgehiagokara. Multzoko zailena da, eta partida bikaina egin beharko dugu haiei gailentzeko». Eta amaitzeko, Hego Korea: «Oso talde teknikoa eta azkarra da. Baina, orokorrean, hobeak garela esango nuke».

Baikor dago Garcia txapelketa honetan bere taldeak egin dezakeenarekin. Lau onenen artean egon daitezkeelakoan dago, taldekideei esaten ez badie ere: «Benetan uste dut urrutira irits gaitezkeela. Oso partida onak jokatu ditugu azkenaldian, eta oso ondo sentitzen gara. Helburuak hor goian egotea izan beharko lukeela uste du. Behintzat hor egoteko ilusioa izatea».

Domina bat lortuko balu, ez litzateke estrainekoa izango munduko txapelketa batean jokalari donostiarrarentzat. Orain dela lau urte, hirugarren postua eskuratu zuten, Londresen. Azkeneko txapelketa horretako esperientzia kontuan izanik, «pauso bat harago» joatea espero du: «Aurten, 2018an baino talde dezente hobea dugu. Fisikoki asko hobetu dugu. Orduan brontzea lortu genuen. Horregatik diot marka hura berdindu edo hobetzeko gaitasuna dugula».

Lesioen gurutze bidea

Kirolari askok lesioengatik utzi behar izaten dute ibilbide profesionala. Garciak bi aldiz hautsi ditu ezker belauneko lotailu gurutzatua eta meniskoa, eta behin eskuin belaunekoak. Guztira hiru lesio larri. Azkena 2019an, 2020ko Tokioko Olinpiar Jokoen atarian. «Nire kirol ibilbidea hor amaituko zela uste nuen, lesionatu eta lehen hilabete eta erdian. Pentsatzen nuen: '30 urterekin, belauna hiru aldiz hautsita… Zer egin behar dut nik?'. Baina pixkanaka-pixkanaka motibazioa berreskuratu nuen».

2020ko Olinpiar Jokoak galduko zituela bazekien, baina gero koronabirusa etorri zen, eta, Jokoak urtebetez atzeratu baziren ere, indarberritzeko ere denbora gehiago behar izan zuen. «Barneratua nuen Olinpiar Jokoak galduko nituela. Ez zidan minik egin horrek. Baina sekulako ilusioa egin dit, pasatu dudana pasatuta, hautatzaileak niri deitzeak horrelako txapelketa garrantzitsu baterako».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©ARITZ LOIOLA / FOKU

«Denboraldi hau niretzat azkena balitz bezala gozatuko dut»

Pettan Uralde

Hamalaugarren denboraldia du De Marcosek Athleticen, eta egunez egun gozatzeko ideiarekin ekin dio sasoi berriari. Guardiako jokalariak Europan kokatu du taldearen helburua, eta lortuko dutelakoan dago.
Hondarribia garaipen bat ospatzen, artxiboko irudi batean. ©Oskar Matxin Edesa / Foku

Hondarribiak irabazi du Castro Urdialesen, eta sailkapena estutu du

Berria

Pasa den asteburuko kolpeari buelta eman dio Ama Guadalupekoa-k. Urdaibaik bigarren amaitu du, eta ondo eutsi dio lidergoari.

<b>Mikel Larrañaga, iaz, Urrezko Kopa irabazi berritan.</b> ©IÑIGO URIZ / FOKU

Sei aizkolari ariko dira bihar Donostian, Urrezko Kopa xede

Berria

Aurrez kanporaketa gainditutako kirolariek udako garaikur nagusia izango dute jokoan, 19:30ean

Realeko jokalariak Take Kuboren gola ospatzen, gaur, Cadizen (Espainia). ©Roman Rios / EFE

Realak Kuboren gol bati esker irabazi du Cadizen

Paulo Ostolaza

Txuri-urdinek gogor lan egin behar izan dute, baina japoniarrak 24. minutuan sartutako golak balio izan die. Debuta egin dute Brais Mendezek eta Momo Chok.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...