Santakrutzak Andoainen

Tokia tokikoari jaietan

'Aiurri' egunkariko langileek irakurri dute santakrutzetako pregoia. Kazetak 25 urte egingo ditu aurten. Langileek eskertu egin dute emandako aukera
Jon Ander Ubeda <em>Aiurri</em> egunkariaren zuzendaria, egoitzaren parean.
Jon Ander Ubeda Aiurri egunkariaren zuzendaria, egoitzaren parean. JON URBE / FOKU Tamaina handiagoan ikusi

Ane Ubegun Goikoetxea -

2019ko maiatzak 1

Hamaika aldiz egon dira Aiurri egunkariko langileak Andoaingo (Gipuzkoa) Santa Krutz jaietako hasierako ekitaldian, argazkiak ateratzen edota bideoak grabatzen. Aurten, ordea, eurei zuzendu zaizkie kameren objektiboak: jai batzordeak pregoilari izendatu ditu Aiurri-ko kideak, egunkariaren 25. urteurrenean, eta atzo irakurri zuten jaiei hasiera ematen dien pregoia, 19:30ean, Zubiaurren. Maiatzaren 5era arte iraungo dute jaiek.

Jon Ander Ubeda egunkariko zuzendariak azaldu duenez, Aiurri egunkariko lankideak «harrituta» gelditu ziren jai batzordeak helarazi zienean pregoilari izango zirela. Lehen ekitaldi horretan egotera «ohituta» daudela dio Ubedak, kazetari diren heinean, baina aurtengoa ez zuten espero: «Ezusteko moduko bat izan zen». Zuzendariak azpimarratu du eskertuta daudela jai batzordeak eman dien aukera horrekin.

Aiurri Aiztondo eta Buruntzaldea eskualdetako egunkaria da, eta astekariak eta hamaboskariak banatzen ditu gune horietako herrietan. Ubedak hiru etapa nagusi zehaztu ditu egunkariaren ibilbideari dagokionez: «Lehenengoa 1994an kokatzen da. Garai hartan, Euskal Herriko euskara elkarte guztietan ikusi genuen erdarazko prentsa zela nagusi, eta euskarazkoak oso pisu gutxi zuela. Giro horretan sortu genuen hamaboskaria». Ondorengo urratsa 2004an eman zuten: «Andoainen eta Urnietan, hau da, Buruntzaldea eskualdean, astekari bat egiteko egitasmoa aurrera atera zen, eta zeregin hori gure gain hartu genuen». Adierazi du orduan sortu zela bigarren egitasmo «indartsua», eta horren ondorioz hazi zela egunkariaren Interneteko katea: «Horrek ekarri zuen aiurri.eus webgunearen dinamika areagotzea, eta gaur egun hedabide talde bat garela esan genezake».

Hasieran ekoizten zuten hamaboskariak aldatu egin zuen egunkariaren edukia lantzeko modua: «Astekariak eraman gintuen informazioa beste modu batean lantzera: kultura, agenda, politika... Halako gaietan trebatu ginen». Teknologiaren munduan murgildu direla dio Ubedak, eta hedabideen funtzioa zein den nabarmendu du: «Aiurrik eta gainontzeko tokiko hedabideek funtzio publiko eta funtzio sozial oso garrantzitsua betetzen dute, eta hedabideen funtzioa serio gisa dago kontsideratuta gizartean. Are gehiago, euskarazko hedabideak garrantzi handikoak dira tokian tokiko gizartean eta komunitatean».

Erdaldunak kontsumitzaile

Egunkariaren kontsumitzaileei dagokienez, Ubedak azaldu du euskaldunez gain euskaraz ez dakitenek ere kontsumitzen dutela Aiurri: «Erdaraz bizi den jende askok tokian tokiko edukiak kontsumitzen dituzte: bideoak ikusten dituzte, argazkiak... Gertaera gehienen gainean gaudenez, Aiurri erreferentziazko hedabide bat da, euskaldunentzat eta euskaldunak ez direnentzat ere». Lorpen hori «konpromiso handiko» talde baten lanaren emaitza dela nabarmendu du zuzendariak, «kalitatezko informazioa» ematen saiatzen direlako. Hori dela eta, gehitu du kontsumitzaileen arteko aniztasun horrek onura egiten diola euskalgintzari: «Euskarazko komunikabide bat erreferentziazkoa izatea beharrezkoa da, ez soilik euskaldunentzat, baizik eta baita erdaldunentzat ere: euskalgintzaren ikuspegitik lorpen handia da».

Datozen urteei begira, Ubedak adierazi du orain arteko dinamika berdinarekin jarraituko dutela lanean Aiurri egunkarian: «Gaur egun egiten ari garen lan ildo hori garrantzitsua da. Ondo legoke kalitatean sakontzea, bai edukiak lantzeko moduan, baita ikus entzunezko alorrean ere». Azken alor horretan «murgilduak» daudela dio, baina akaso hobekuntzak egin beharko lituzketela. Dena den, adierazi du eskualdeetako herritarren beharrak asetzen jarraituko dutela: «Tokian tokiko informazioa ematen ahalegintzen gara, eta hori egiten jarraitu nahiko genuke denborarekin».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiari 1813an su eman ziotela oroitzeko Dora Salazarrek egindako eskultura, maskara jantzita ©JUAN CARLOS RUIZ / FOKU

COVID-19aren uste ustelak

Mikel P. Ansa

COVID-19aren pandemia ukatzen duten joera batzuek indarra hartu dute uda honetan. Haiek zabaldutako uste batzuk zeinen okerrak diren azaldu dute Miren Basaras eta Guillermo Quindos mikrobiologoek artikulu sorta honetan.

Ikasle batzuk, ikasgelan, ikasturteko lehen egunean egindako argazki batean. ©IDOIA ZABALETA / FOKU

Eskola orduak: eztabaida zaharberritua

Mikel O. Iribar

Ordutegi jarraituaren aldeko plataforma bat sortu dute: institutuetatik kanpo ere jartzea nahi dute. Nafarroan hala ari dira, baina Jaurlaritzak ez du onartu. EHIGEk uste du eztabaida pedagogikoa behar dela.

COVID-19a atzemateko test bat, Donostian. ©GORKA RUBIO / FOKU

Beste 612 positibo atzeman dituzte Hegoaldeko azken zenbaketetan

Uxue Rey Gorraiz

Hiru pertsona hil dira birusaren ondorioz Hego Euskal Herrian, Nafarroan hirurak. 510 lagun daude ospitaleratuta; horietatik 84, ZIUetan

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Informazio osagarria