Albistea entzun

Trafikoa

Euskal Herriko errepideetan 85 lagun hil dira istripuz urtebetean

Pandemiak 2020an eragindako geldialdiaren ostean, 2021ean gidariak berriz atera dira errepidera, eta, horrekin batera, %20 ugaritu dira heriotzak. Hildakoen %82 gizonezkoak izan dira

Zigoitian bi emakume hil ziren istripu batean, kamioi batek haien autoa jota.
Zigoitian bi emakume hil ziren istripu batean, kamioi batek haien autoa jota. DAVID AGUILAR / EFE Tamaina handiagoan ikusi

Irati Urdalleta Lete -

2022ko urtarrilak 18

Mundua gelditu zen 2020an. Oraindik ere galga jarrita jarraitu du 2021ean, baina hasi da pixkanaka martxa hartzen. Errepidean ere mugimendu handiagoa sumatu da azken urtean, eta, horrekin batera, hildakoen kopurua ere handitu egin da: 85 lagun zendu dira Euskal Herriko errepideetan, 2020an baino hamalau gehiago; hau da, %20 handitu da kopurua. Beste era batera esanda: pertsona bat hil zen lau egunetik behin trafiko istripuz.

2020a salbuespena izan zen, ordea, hildako bai kopuruari eta bai errepideetako trafikoari dagokienez. Aurreko urteekin konparatuta, 2021ean hildakoen kopuruan beheranzko joera mantsotu egin dela ikus daiteke: 2019an baino sei hildako gutxiago izan dira, eta 2018an baino bi gutxiago.

Lurralde bakoitzean hil direnen kopuruari erreparatuta, Nafarroako errepideetan izan da heriotza gehien: 29. Iaz baino 11 hildako gehiago egon dira, eta 2019an baino bat gehiago. N-121-A errepidea bereziki arriskutsua da: iaz bi lagun hil ziren, 2020an baino bi gutxiago. Errepide horren egoeraz kexatu ziren iaz ere herritarrak, eta apirilean, esaterako, herritarrek errepidea moztu zuten 11 puntutan, bost minutuz. Gobernuak hasiak ditu 2+1 motako errepide bihurtzeko lanak. Araban, bikoiztu egin da hildako kopurua 2020arekin alderatuta, eta 2019an adina hildako izan dira: hamar. Lapurdin ere, igoera: 11 lagun hil dira trafiko istripuz, 2020an baino bat gehiago eta orain bi urte baino hiru gehiago.

Gainerako lurraldeetan txikitu edo berdin mantendu dira errepideetako heriotzak: hamasei hildako izan dira Bizkaian 2020an adina eta 2019an baino sei gutxiago; beste hamasei Gipuzkoan 2020an baino bat gutxiago eta 2019an baino hiru gutxiago, eta hiru Nafarroa Beherean 2020an baino bi gutxiago eta 2019an baino bat gutxiago. Zuberoako errepideetan ez da inor hil, hirugarren urtez jarraian. Baina ezbehar oso larri bat izan zen ekainaren 9an Biarnon. Hiru haur zuberotar hil ziren ondorioz, eta ama larriki zauritu.

Izan dira beste hainbat istripu larri ere. Soraluzen (Gipuzkoa) irailaren 2an gertatutakoa izan da guztietan txarrena: kamioi baten eta auto baten arteko talkaren ondorioz, 19 eta 20 urteko hiru gazte hil ziren. Gainera, Armiñonen (Araba) bi lagun hil ziren, haien furgoneta errepidetik aterata; Zigoitian (Araba) ere bi hildako izan ziren, autoan zeudela kamioi batek haien autoa jota; eta Vianan (Nafarroa) ere bi lagun hil ziren, auto istripu batean.

Zaurgarrienen arriskua

Autoa: horixe da istripu baten ondorioz hil ziren gehienek zerabilten garraio mota, hain zuzen ere, 40k. Beraz, hildakoen ia erdiak, %47, autoa erabiltzen ari ziren. Motoan zihoazen istripu baten ostean hildako 26 (%31); bizikletan zebiltzala harrapatuta zazpi lagun hil ziren (%8); zazpi oinezko zendu ziren (%8); kamioi batean zihoazen hiru hildako (%4); traktorea gidatzen ari zela hil zen beste bat, eta quad batean zebilela beste bat. Hau da, istripuen %47 kolektibo zaurgarrietako kideek —motorzaleak, oinezkoak eta txirrindulariak— izan zituzten.

Adierazgarria da harrapatuta hildako oinezkoen kopuruaren jaitsiera: 2019an, hamazazpi hildako izan ziren; 2020an, zortzi, eta 2021ean, zazpi. Bereziki entzutetsua izan zen maiatzaren 28an gertatutako istripua: auto batek 32 urteko oinezko bat harrapatu zuen, eta 80 metroan arrastaka eraman zuen.

Garraiobidea ez den bezala, hildakoen sexua ere ez da hutsala: 85 hildakoetatik 70 gizonezkoak izan dira; hau da, %82,4. Ez da kasualitatea izan. Aurreko urteetan ere antzekoa gertatu zen: 2019an hildakoen artean, %83,5 ziren gizonezkoak, eta 2020an hildakoen %84. Oraindik alor horretan egiteko dagoen lanaren seinale dira datuok.

Galga jarri behar

Hirietako trafiko istripuak eta horietan gertatzen diren heriotzak murrizte aldera, neurri berri bat dago indarrean iazko maiatzetik. Horren arabera, debekatuta dago Hego Euskal Herriko hiri bide gehienetan orduko 30 kilometroko abiadura gainditzea. DGT Espainiako Trafiko Zuzendaritzak azaldu zuenez, orduko 30 kilometroko muga duten eremuetako joerak aztertuta, ikus daiteke istripuen kopurua %40tik gora murriztu daitekeela neurri horren bidez; besteak beste, orduko 50 kilometroko abiadurarekin alderatuta frenatzeko distantzia erdira jaisten delako. Gainera, orduko 50 kilometroko abiaduran gertaturiko harrapatzeetan, oinezkoak hiltzeko %90eko probabilitatea du, eta abiadura murrizten denean ehuneko hori %10era jaitsiko dela ziurtatu zuen. Hiriburuetako datuei begiratuta, hiru hildako izan ziren iaz Donostian, eta bana Iruñean, Gasteizen eta Baionan. Gainerako hiriburuetan ez zuten trafiko istripuz hildakorik zenbatu.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

LGTBI+fobiaren aurkako protesta. bat, Gasteizko Zabalgana auzoan. ©Jaizki Fontaneda / Foku

LGTBI kolektiboek «saretzera» dei egin dute

Jone Arruabarrena

Gorroto diskurtsoaren hedapenaz eta komunikabideek kolektiboaren aurkako erasoei ematen dieten trataeraz «kezkatuta» daudela esan dute

Irene Montero, Espainiako Berdintasun ministroa, artxiboko irudi batean. ©JAVIER LIZON / EFE

Onartu eginen dute abortuaren legea, higiene gaien zerga jaitsi gabe

Ion Orzaiz

Hileko mingarriaren ondoriozko gaixoaldia eta erditze aurreko baimena jasoko dituzte testuan. Jaurlaritzak eta EH Bilduk ontzat jo dute araua

Tomas Rubinen senideak, atzo, Bilbon, gudariaren gorpuzkiak hartu berri. ©MARISOL RAMIREZ / FOKU

Beste bost gudari identifikatu dituzte Begoñako hilerrian

Olatz Enzunza Mallona

Identifikazio xaflei esker atzeman dituzte bost gudariak. Gogora institutuak espero du 2023ko udaberrirako amaitzea identifikazio lana

Ikusgune behatokiak atzo kaleratu zuen txostenaren aurkezpena. ©RAUL BOGAJO / FOKU

Lau urtean hirukoiztu egin dira Ikusgunen salatutako eraso LGTBIfobikoak

Jone Arruabarrena

Eraso transfoboen gorakadaz ohartarazi du behatokiak, eta Diputatuen Kongresuan trans legea tramitatzean sortu zen «gorroto giroari» egotzi diote igoera

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...