Albistea entzun

Gaurtik edonon, edonorekin

Abian da hirugarren Euskaraldia, abenduaren 2ra arte. Ekitaldi jendetsuak egin dituzte Euskal Herriko bost hiriburutan. Hizkuntza ohituren gainean gogoeta egiteko deia egin dute antolatzaileek

<b>1. Iruñea.</b> Argazki jendetsua egin zuten parte hartzaileek Zentral aretoan.
1. Iruñea. Argazki jendetsua egin zuten parte hartzaileek Zentral aretoan. IÑIGO URIZ / FOKU Tamaina handiagoan ikusi

Ion Orzaiz -

2022ko azaroak 18 - Iruñea

Gaurtik, bizi eta prest. Hamabost eguneko ariketaz harago doan egitasmoa da Euskaraldia. Euskararen herria kalean ikusarazteko, komunitateko kideen arteko loturak sendotzeko, eta hizkuntza ohituretan eragiteko engaiamendu kolektibo itzela. Gaurtik eta abenduaren 2ra arte, euskaraz edonorekin, edonon eta edonoiz solastatzeko gonbita egin dute Euskaraldiaren antolatzaileek. Nor bere mailaren eta gaitasunaren arabera, ahobizi edo belarriprest, baina ahal den guztietan. Hasi da hitzez ekiteko garaia.

Atzo iluntzean egin zituzten Euskaraldiaren hasierako ekitaldi nagusiak Baionan, Bilbon, Donostian, Gasteizen eta Iruñean. Horiez gain, ordea, jarduera propioak antolatu zituzten herri eta eskualde askotan ere, hamabost eguneko ariketa sozialari ongietorria egiteko.

Euskaraldia «zutabe anitzeko egitasmoa» dela nabarmendu zuten Euskaltzaleen Topaguneko antolatzaileek atzo. «Erakunde eta norbanakoen elkarlanaren erakusle». Elkarlan horren isla izan ziren hiriburuetako ekitaldiak, bertan izan baitziren Euskaraldiko Koordinazio Mahaiko kide diren ordezkari politikoak ere.

Hala, Bilboko ekitaldian izan zen Bingen Zupiria, Eusko Jaurlaritzako Kultura eta Hizkuntza Politikako sailburua, Goiatz Urkijo Euskaraldiko koordinatzailearekin batera. Nafarroako Gobernuaren izenean, Herritarrekiko Harremanetarako kontseilari Ana Ollok egin zuen aurkezpena Iruñean. Eta Antton Kurutxarrik, EEPko presidente eta Euskal Hirigune Elkargoko Hizkuntza Politika lehendakariordeak, Baionako ekitaldian parte hartu zuen, Kike Amonarriz Euskaltzaleen Topaguneko presidentearekin batera.

Iruñeko Zentral aretoa lepo bete zen, Euskaraldiaren hasiera ospatzeko. Ana Olloz gain, beste hainbat ordezkari politiko, sozial eta sindikal ere batu ziren festara. EH Bilduren izenean, han izan ziren Laura Aznal legebiltzarkidea, eta Joseba Asiron eta Maider Beloki zinegotziak. Geroa Baiko Maria Solana eta Mikel Asiain parlamentariek ere parte hartu zuten ekitaldian, Nafarroako Parlamentuko presidente Unai Hualderekin batera. Zurekin Nafarroa ezkerreko koalizio sortu berriak ere ordezkaritza joria bidali zuen, Zentral aretoan izan baitziren Begoña Alfaro lehendakarigaia, Txema Mauleon Iruñeko alkatetzarako hautagaia eta Carlos Guzman Nafarroako Ezker Batuko koordinatzailea.

Hauspoa, herriz herri

Iñaki Sagardoi Euskaraldiaren Nafarroako koordinatzaileak hartu zuen hitza agertoki gainean, herriz herri eta eskualdez eskualde ariketa soziala antolatzeko lanetan aritu direnei eskerrak emateko: «Euskaraldia elkarlanean egiten den egitasmo erraldoia da, baina zuek zarete herrietan, bailaretan, eskualdeetan eta auzoetan euskarari hauspoa ematen diozuenak».

Goizean, Laba aretoan egin zuten aurkezpena Ana Ollo kontseilariak eta Oskar Zapatak, Topaguneko Nafarroako zuzendariak. «Euskaraldiak abagune ederra eskaintzen digu gure hizkuntza ohituren inguruan hausnartu eta urrats berriak irudikatzeko», azaldu zuen Ollok: «Norekin, noiz eta non saiatuko gara elkarrizketak euskarara ekartzen? Bi aste ditugu hitzez ekinda lorpen berriak izateko. Lorpen txiki, ertain eta handiak. Denak behar ditugu inertziak aldatzeko».

Horretarako, txapa erabiltzeko galdegin zuen Zapatak, «aurreko bi aldietan eginiko ikerketek erakutsi baitute ahobizi edo belarriprest modura identifikatzeak asko lagundu zuela hizkuntza ohituren aldaketetan». Hain zuzen, txapa jantzita eman zioten hasiera Euskaraldiari atzo: 19:30ean, «txapa janzte» kolektiboa egin zuten hiriburu guztietan aldi berean.

Horren ondotik, musikak presentzia nabarmena izan zuen: Gasteizen, Dj Malandrok giroa goxatu zuen Jimmy Jazz aretoko ekitaldian, eta Lenoir & Micek kontzertu bat eman zuten Hala Bedi tabernan. Donostiako Bulebarrean, musika eta dantza herrikoien emanaldiaz gozatu ahal izan zuten parte hartzaileek. Bilboko Alondegian, berriz, Inun eta Yogurinha Borovak jarri zituzten lehen doinuak. Iruñean, berriz, Olaia Intziarte, Broken Brothers eta Dj Reimy aritu ziren.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lezetxikiren Lagunak taldekoek ateratako argazki batzuk, Lezetxikoko galeria suntsituan. ©LEZETXIKIREN LAGUNAK

AHTaren tunel batek Lezetxikin kalteak egin dituela salatu dute

Xabier Martin

Aztarnategi baliotsuaren gertuko galeria bat suntsitu du tunelak, espeleologo batzuek dokumentatu dutenez. Euskal Herriko giza aztarnarik zaharrenak topatu dituzten lekua da Arrasateko koba
Osasun langile bat, atzo, Nafarroako Ospitale Unibertsitarioaren kanpoaldean. ©IÑIGO URIZ / FOKU

Osasunbideko gehiengo sindikalak grebara joko du, Sindikatu Medikotik bereiz

Ion Orzaiz

LAB, SAE, UGT, ELA, Afapna eta CCOOk hilaren 15erako egin dute deialdia. «Osasun publikoaren kalitatea eta lan baldintzak» hobetzea daukate xedetzat. Negoziazioa gobernuaren eta Sindikatu Medikoaren artean egin izana salatu dute
Bidaiari batzuk, Donostiako autobus geltokian. ©GOTZON ARANBURU / FOKU

Ibilbide luzeko autobusak doakoak dira jada ohiko bidaiarientzat Hegoaldean

Jone Arruabarrena

Berme bat ordaindu beharko da, eta gutxieneko bidaia kopuru bat egin
Euskal Herriko mugimendu feministaren agerraldia, atzo, Gasteizen. ©ENDIKA PORTILLO / FOKU

Zaintza sistema «eraldatzeko» mobilizatuko da mugimendu feminista

Edurne Begiristain

Lehen mugarria Martxoaren 8an ezarriko du Euskal Herriko mugimendu feministak. Zaintza «erantzukizun soziala» bilakatzea izango du helburu borroka dinamikak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.