Albistea entzun

Netanyahuren aldeko blokeak gehiengo osoa berreskuratu du Israelen

Botoen %85,9 zenbatuta, lehen ministro ohiaren aldeko blokeak 120 eserlekuetatik 65 bereganatu ditu Israelgo bozetan. Likud alderdi eskuindarrak izan du babesik handiena: 32 aulki lortu ditu
Benjamin Netanyahu, atzo, hauteskundeen emaitzen berri izan osteko mintzaldian.
Benjamin Netanyahu, atzo, hauteskundeen emaitzen berri izan osteko mintzaldian. ABIR SULTAN / EFE Tamaina handiagoan ikusi

Mikel Elkoroberezibar Beloki -

2022ko azaroak 3

Benjamin Netanhayu da Israelgo historian lehen ministro karguan denbora gehien iraun duen politikaria. Guztira hamabost urtez aritu da Israelgo Estatua zuzentzen: 1996tik 1999ra, eta 2009tik 2021era. Laster berrekingo dio gobernua zuzentzeari. Herenegun egin zituzten Israelgo Parlamenturako hauteskundeak, eta, alderdi ugari aurkeztu baziren ere, bi blokeren artekoa izan zen lehia: Netanyahuren aldekoen eta aurkakoen artekoa. Lehenek eskuratu dute gehiengo osoa, eta, ondorioz, lehen ministro ohiak dena du aldeko agintera itzultzeko.

Gaur arratsaldean emango dute behin betiko emaitzen berri, baina botoen %85,9 zenbatuta, Netanyahu babesten duen eskuineko blokeak eskuratu du Knesseteko —herrialdeko parlamentuko— eserlekuen gehiengo osoa. Behin-behineko emaitzen arabera, 32 eserleku eskuratu ditu Netanyahuren Likud alderdiak, eta, babesa adierazi dioten gainerako alderdiekin, 65 aulki ditu bere alde lehen ministro izandakoak —gehiengo osoa eskuratzeko parlamentuko 120 diputatuetatik 61 lortu behar dira gutxienez—. Izan ere, Sionismo Erlijiosoa eskuin muturreko koalizioak 14 eserleku lortu ditu; eta Xas eta Tora Judaismo Batua alderdi ultraortodoxoek, berriz, 11 eta 8 eserleku eskuratu dituzte, hurrenez hurren.

Sionismo Erlijiosoa aliantza ultraeskuindarrak Netanyahu babestu du, baina ez musu truk. Itamar Ben-Gvir buruzagi ultrak Segurtasun ministro kargua eskatu dio trukean, eta Defentsa ministroarena Bezalel Smotrich koaliziokidearentzat.

Atzoko ordu txikitan igo zen Netanyahu oholtzara, Jerusalemen, emaitzen inguruan hitz egitera. Behin betiko emaitzen «zain» dagoela esan bazuen ere, bere burua garailetzat jo zuen: «Argi dago herriak aldaketa nahi duela. Ez du ahultasuna nahi, indarra baizik».

Yesh Atid, bigarren

Aurkako blokean, Yair Lapid jarduneko gobernuburuaren Yesh Atid alderdi «zentristak» jaso du boto gehien, 24 parlamentarirekin. Netanyahuren aurkakoen artean, Batasun Nazionala koalizioa da bigarren indarra eserleku kopuruan, 12 beretu baititu; zentro-eskuineko Urdina eta Zuria eta Itxaropen Berria alderdiek osatzen dute.

Netanyahuren aurka dauden beste lau alderdik ere lortu dute ordezkaritza; besteak beste, Alderdi Laboristak eta Zerrenda Arabiar Batuak. Lehen ministro ohiak, beraz, 55 parlamentari ditu aurka, behin-behineko emaitzen arabera.

Dena den, falta diren 700.000 botoak zenbatzean, eserlekuen banaketa alda liteke. Izan ere, ganberan sartzeko baldintza da gutxienez %3,25eko babesa eskuratzea, eta, langa hori gaindituz gero, lau ordezkari eskuratzen dituzte automatikoki. Meretz alderdi ezkertiarrak eta Balad alderdi arabiarrak ez dute eserlekurik bereganatu oraindik, ez dutelako parlamentuan sartzeko baldintza hori bete. Ez dabiltza urrun, ordea: Meretzek botoen %3,19 eskuratu du, eta Baladek, berriz, %3,04. Auzo arabiarretako botoak zenbatzea falta da, eta ganberan sartzeko langa gaindi lezakete behin betiko emaitzekin.

Netanyahu ustelkeriarekin lotutako auziengatik akusatua izan zenetik, ezegonkortasuna gailendu da Israelen. Horren isla dira herenegungo bozak, bosgarrenak hiru urte eta erdiko epean.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Poliziaren indarkeriaren kontrako manifestazio bat, atzo, Atlantan, Georgia estatuko hiriburuan. ©ERIK S. LESSER / EFE

Poliziak Nicholsi eman zion jipoiak protestak piztu ditu AEBetan

Gorka Berasategi Otamendi

Ostiralean publiko egin zituzten bost poliziak gazte afro-amerikarrari eman zioten jipoiaren irudiak. Grabazioetan ikusten denez, bortizki jo zuten, baita aurre egiteko aukerarik ez zuenean ere

 ©EMILIA GUTIERREZ / LV

«Ezohiko egoera bat sortu dugu: epaileek iritzia ematen dute guztiaren inguruan»

Mikel Elkoroberezibar Beloki

Espainiako botere judizialak joera erreakzionarioa hartu duela uste du Pedro Vallinek, eta hori ez dela kasualitatea. Azaldu du Espainiako Estatuak bere iraupena arriskuan ikusten badu demokrazia «etsaitzat» eta «mehatxutzat» har dezakeela.
Greziatik kanporatutako migratzaile talde bat, baltsa batean, Turkiako kostazainen esku gelditzear. ©ERDEM SAHIN / EFE
Jerusalemgo atzoko erasoan zauritutako bat, esku ohe batean. ©A. SAFADI / EFE

Bi israeldar larri Jerusalemen izandako beste eraso batean

Berria

Erasotzailea 13 urteko nerabe palestinar bat da, Israelgo Poliziaren arabera. 42 lagun atxilotu dituzte Zisjordanian

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.