Albistea entzun

KRITIKA. Zinema

Musika biziduna

Andoni Imaz -

2022ko apirilak 9

'Orkestra Lurtarra'

Zuzendariak: Joseba Ponce, Imanol Zinkunegi. Gidoilariak: Harkaitz Cano, Eneko Olasagasti. Musika: Joseba Ponce. Herrialdea: Euskal Herria. Iraupena: 70 minutu.

Hitz jokoek eta hizkuntzaren jolasak ez dute etenik Harkaitz Canoren Orkestra Lurtarra liburuan, kontakizuna bera pizzicato erara idatzia balego bezala, esaldi bakoitzari atximur eginez, pasarte zoro batetik bestera jauzika, atalkako kontakizunak ematen dion askatasunaz baliatuta. Jolas horrek irudimen biziko mundu bat itxuratzen du, gainera, baliabide literarioen bidez: elkarrizketa eta gertaera dibertigarriek gogoa astintzeko balio dute.

Bada nahikoa arrazoi pentsatzeko Manu erratz jotzailearen eta lagunen ibilerak film bihurtzea ez dela lan samurra. Eta, azkenean, istorioa zeharo aldatu dute, jatorrizko materialari bultzaka eta tiraka. Elkarren osagarri diren bi helduleku nagusi jarri baitituzte: Stefano Salegi manager iruzurtia, filmeko maltzur ergela, ekintza gidatzeko bultza egiten duena, eta Stella Panini musikari izarra, Manuren desirari tiraka dabilena.

Zentzu bat ematen diote ibilbideari, baina, era berean, arinkeria puzten dute, sakontasuna ekarri baino gehiago —berdin Krokantiren familiak—. Aldiz, istorioaren ikuspuntu berriak, abiaburua Manuren helduaroan kokatzeak, balio du denboraren iragateaz, gazteetako ametsez eta bakoitzak bere bideari segitzearen garrantziaz aritzeko.

Joseba Ponce eta Imanol Zinkunegi buru dituen animatzaile talde zabalak sortu duen mundua bat dator kontatzen denaren tonuarekin, diseinuei esker, neurri batean: pertsonaiak —zer dibertigarriak Perfumetti anaiak—, hiriak, ibilgailuak... Dena fantasiaren mesedetan egina dago, Lur eta Amets (2020) aurreko laneko irudi errealista koloretsuak alde batera utzita.

Ekintzak gidatzen du filma, Marx anaien istorio baten gisan, eta, kaosak gain hartuta, galdu egiten da liburuak jolasaren bidez emandako hausnarketek sortzen duten plazera, pelikulari kosta egiten baitzaio elkarrizketen graziari eustea, eta horrek eragiten baitio nekerik handiena erritmoari. Izaera kaotiko horretan, gozatzeko modukoa da, ordea, animazioa zer leiala den musikarekin, irudiak eta soinuak nola osatzen duten elkar une guztietan.

Izan ere, Ponceren musikak distira egiten du filmean, aldikako pieza laburretan eta osoki jotakoetan —itsasontziko eta New Yorkeko kantaldietan—. Estilo guztiek kolorea ematen diote lanari.

Puntako estudioek aise berenganatzen dute animaziozko zinemari begiratzen dion foku ahularen argi guztia. Eta, bitartean, beste mapa batean kokatuta, Lotura Films estudio lurtarrak bere-berea duen estilo baten arabera sortzen jarraitzen du, mugak muga, marrazki bizidunen estetika erronka bakoitzera egokituz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

<b><em>Simone Veil <em>pastoraleko mustraka bat; 95 arizale aste hondar guziez elkartzen dira.</em> </em></b> ©SEVERINE DABADIE

Veil pastorala hasia da ate joka

Ainize Madariaga

Hiru emanaldi eginen ditu 'Simone Veil' pastoralak Muskildin: uztailaren 24an eta 31n, eta agorrilaren 6an. Bostehun lagunendako bazkaria prestatuko dute ikastolek egunotan
Sarrerak salgai, bertsosarrerak.eus gunean. ©

Bertsolari Txapelketarako sarrerak erosteko moduan daude, arazo teknikoak konponduta

Edu Lartzanguren

Atzo jarri zuten martxan sarrerak saltzeko sistema, baina, eskaera kopuru handia zela-eta, gainezka egin zuten zerbitzariek

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...