'Bizi bagina bezala'

Aretxabaletatik datorren taldea da Nhil, duela bi urte lehenengo lana argitaratu eta orain bigarrena besapean dakarrena. Aurrekoaren ildotik jarraituz, Bizi bagina bezala honetan ere pop doinu goxoak eta funka dira nagusi, ohikoak ditugun gitarra, baxu eta bateriaz gain, piano, tronboi eta saxofoiarekin osotasun bat lotuta. Bederatzi abestiko disko honetan badu lekua bluesak ere, Ahaztu baino lehen abestian nabaritzen den bezala; eta rock nahiz jazz printzak aurki ditzakegu handik eta hemendik. Lan ederra egin du seikoteak honakoan, eta aurrekoa baino osoagoa eta helduagoa den diskoa sortu du, eguraldi txarrarekin etxean gustura entzutekoa. Ez da agian top salmentetan azalduko, baina ezagutzea merezi duen horietakoa da.