Musika. Raitx
'Abereek erantzungo balute'
Diskoetxea: Balio dute.
Udaberriko uztaren parte izan dugu Raitxen estreinako diskoa, baina, hilabete batzuk beranduago bada ere, aipamena merezi duten horietakoa da. Bakarkako proiektuan baina lagunez inguratuta abenturatu zen Rakel Arenaza, eta, emaitza ikusita, argi esan daiteke ez dela alferrikako lana izan eurena, amankomuneko proiektua izatera iritsi baitira, talde izaera sendoa agertuz. Elektronikaz, rockez eta folkez bustitako pop ilun eta intimista ekarri digute Abereek erantzungo balute lanean, berebiziko garrantzia duten hitzei musika jarriz sortuan. Hipnotizatzen zaituzten kantak goxatzen eta sutzen zaituztenekin nahasten dira barreneraino iristen den sei abestitako disko honetan. Itxi begiak eta gozatu musikaz.
Iruzkinak
Ez dago iruzkinik
Ordenatu