'Bao Bei Er / Baby'
Zuzendaria: Liu Jie. Aktoreak: Yang Mi, Guo Jingfei, Lee Hong-Chi, Wang Yanjun, Zhu Shaojun, Yan Surong. Herrialdea: Txina.Iraupena: 96 minutu.
Ia saihetsezina da pelikula txinatar garaikideetan estatuaren burokrazia astunarekin topo egitea, eta, alde horretatik, Bao bei er ez da salbuespena. Horiek horrela, ama lanak egin dituenarekin bizitzen segitzeko asmoa agertzea edo haur txiki baten bizitza salbatu nahi izatea borroka eremu bihurtuko dira. Are gehiago halako batean pertsona temati bat denean gauzak aldatzen saiatzen dena.
Azkenean, horixe baita filmak kontatzen duena, gazte baten nahia inguruan sumatzen dituen bidegabekeriei aurre egiteko. Ez diote balioko jasoko dituen azalpenek, ezta legeak dioenak ere; asmo onenarekin, bere eskura dagoen guztia aldatzen saiatuko da, berak pairatu duena beste batzuek pairatu behar izan ez dezaten.
Kontua da tema hori istorioaren motor bakar bihurtuko dela eta, egoerak errepikatzearen ondorioz, zertxobait astun bihurtuko direla protagonistaren adorea eta kemena. Heroi bakartiak sistema baten kontra eta ezinean, horixe da Bao bei er-ek eman nahi digun mezua, baina, intentzio onbera duen istorioa izateaz gain, pelikula ez da urrutirago ailegatuko.
