Albistea entzun

«Donostia salgai jarri dute»

Donostiako Udala azken legegintzaldian sustatzen ari den neurrien bidez «hiri eredu jakin bat inposatzen» ari dela salatuko dute bihar manifestazio batean, Donostia Defendatuz plataformak deituta. Hiriaren geroa «enpresa jakin batzuen» esku utzi dutela ohartarazi dute.
Amador Biteri eta Eihar Egaña, ezkerretik, eta Xabier Rubio, eskuinetik lehena, manifestazioa aurkezten, atzo.
Amador Biteri eta Eihar Egaña, ezkerretik, eta Xabier Rubio, eskuinetik lehena, manifestazioa aurkezten, atzo. J. URBE / FOKU Tamaina handiagoan ikusi

Jokin Sagarzazu -

2019ko maiatzak 3 - Donostia

Donostia zeharkatuko duen metro pasabidea, Añorga auzoan egitekoak diren beste saltoki handia; aspaldiko denda eta ostatuen ixtea; lau urtean 33 hotel berri zabaltzea eta turismora bideratutako etxebizitzen alokairuen ugaritzea; hirigintza ondare diren eraikinak botatzea; eremu naturalen artifizializazioa... Hori dena ahalbidetu duten erabakiekin, eta beste batzuekin, Donostiako Udala hiri eredu jakin bat «sustatzen eta inposatzen» ari dela salatuko dute bihar, 17:30ean, Easo plazatik abiatuko den manifestazioan. Donostia Defendatuz-ek deitu du mobilizaziora. Urte hasieran sortu zuten koordinakundea hainbat taldek, «kezka» batek bilduta: uste dute Donostiaren eta donostiarren «ondare sozialari, kulturalari eta naturalari» kalte egiten ari dela udala.

Talde bakoitzak aldarrikapen zehatzak ditu; baina, azaldu dutenez, askotan zail egiten zaie horiek gizarteratzea, eta horregatik batu dira. Eihar Egaña Bizilagunekin plataformakoa da. Horko kideak kezkatuta daude «hiriaren turistifikazioarekin». Haien eta beste taldeen aldarrikapenek «lotura» dutela azpimarratu du Egañak. «Bakoitzak jarraitzen du bere borrokarekin; bakoitzak dauka bere bidea; baina batzea bozgorailu bat da, eta izan daiteke modu bat heltzeko bestela iristea zail izango litzatekeen jende eta toki batzuetara».

Añorga auzoan udalak eraiki asmo duen merkataritza gune berriaren (Belartza 2) aurkako plataformakoek ere parte hartzen dute koordinakundean. Kide horietako bat da Eli —ez du abizenik eman nahi izan—. Haren ustez, gizarte mugimenduek «ezinbestekoa» dute batzea, eta, kasu honetan, «are gehiago». «Konturatu gara daukagun arazoa komuna dela: udalaren hirigintza politika. Eta horren baitan hartzen ari diren erabakiek eragina dutela guztiongan». Salatu du udalean ez dutela herritarren «interes orokorra» aintzat hartzen, «interes ekonomiko partikular eta jakin batzuk baizik». «Neurri horien bitartez, udalak finantzaketa lortzen du, eta diruaren truke jarri du hiria salgai». «Nik esango nuke saltzen ari direla urte luzez eraiki dugun gizartea, harremanak egiteko genuen modua», gaineratu du Dendartean elkarteko Amador Biterik.

Denek onartu dute Donostia ez dela salbuespena, «fenomeno zabal baten beste adibide bat» dela, baina azpimarratu dute prozesu hori Donostian «azkartu» egin dela azkenengo urteetan. Biteriren arabera, legegintzaldi honetan aldaketa sakon bat egon da EAEko erakundeetan, eta Donostiako Udala izaten ari da «aktore nagusia». «Ezagutzen genuen Gipuzkoak ez dauka batere zerikusirik egungoarekin».

Instituzioen jarreraren inguruan, Biterik ezbaian jarri ditu euren erabakiak «justifikatzeko» ematen dituzten azalpenak. «Gezurretan ari dira. Nola edo hala aberastasuna sortu nahi dute, baina aberastasun faltsu bat da hori: pertsona eta enpresa jakin batzuen mesedetan ari dira, ez herritarrenean».

«Isilpeko» erabakiguneak

Udala hartzen ari den erabaki askoren legezkotasuna zalantzan jartzen dute koordinakundeko kideek. Haietako batzuek jada jo dute beste instantzia batzuetara, auzitegietara bereziki. «Dagoeneko auzitara eraman ditugu hainbat erabaki, eta prest gaude beste leku batzuetara eramateko ere», azaldu du Haritzalde naturzaleen elkarteko Xabier Rubiok. Horietako batzuk «irabazi» egin dituztela nabarmendu du: «Herritarrek jakin behar dute gizarte mugimenduen bidez lor daitezkeela gauza asko», azpimarratu du.

«Udalak egiten duena fiskalizatzen dugu herri mugimenduok», erantsi du Elik. «Haiek erraza dute: denon dirua daukate. Gure diruarekin ordaintzen dituzte aholkulari eta abokatuak, eta horiek erabiltzen dituzte gure aurka egiteko ere bai. Guk nahi dugu urbanismo legezko, iraunkor eta parte hartzaile bat».

Koordinakundeak salatu du 2010. urtetik berritu gabe dagoela Donostiako Hirigintza Plana, eta, horren ordez, udala «bere kabuz» erabakiak hartzen ari dela, funtsean hirigintza plan bat osatzen dutenak edota indarrean dagoenari eragiten diotenak, «goitik behera». «Hartzen dituzten erabaki horietako asko udalera eramaten dituzte oso landuta eta atzera egin ahal izateko zirrikitu gutxirekin», salatu du Haritzaldeko kideak.

Udalaren «jarduteko modu hori» kritikatu du Belartzako merkataritza gune berriaren aurkako plataformako kideak ere. «Udaletik kanpo hartzen dira erabaki horiek, isilpeko erabakiguneetan, eta, gero, oharkabean pasatzen dira. Jakin badakite herritarren gehiengoak ez duela bat egingo, eta mantu bat jartzen dute gainetik edota eskura duten propagandarako makineria erabiltzen dute». Haren ustez, «aurrez planifikatuta eta engranatuta dagoen estrategia» bat da hori.

Bat dator horrekin Haritzaldeko kidea ere. Erabakiak arrapaladan hartzen ari direla dio, eta udala nahi ala nahi gabe makurtzen ari dela enpresa handien interesetara. «Moratoria moduko bat beharko litzateke; lasai hausnartzeko zer-nolako hiria nahi dugun. Orain hartzen diren erabakiak baldintzatzen ari dira hiriaren eta herritarron geroa».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maria Txibite lehendakaria eta Ramon Alzorriz PSNko bozeramailea, Nafarroako Parlamentuan. ©JESUS DIGES / EFE

Sindikatu Medikoaren hordagoari men egiteko prest azaldu da Txibite

Ion Orzaiz

Lehendakariak justifikatu du Osasunbideko sendagileei aukera ematea osasun pribatuan ere jardun daitezen: «Profesionalak erakartzeko bidea da». Erabakiaren aurka azaldu dira EH Bildu eta Ezkerra
LAB sindikatuak elkarretaratzea egin zuen atzo, Iruñean. ©JAGOBA MANTEROLA / FOKU

«Pribatuaren interesak babestea» egotzi dio LABek Sindikatu Medikoari

Itsaso Jauregi

Iruñeko elkarretaratzean, sindikatuak adierazi du sendagileen esklusibotasuna kentzea osasun publikoaren kalterako izanen dela
Bilboko etxegabearen heriotza gaitzetsi zuten atzo iluntzean, udaletxe aurrean. ©MONIKA DEL VALLE / FOKU

«Pobreen aurkako gerra» salatu dute, hildako etxegabea oroitzean

Maite Asensio Lozano

Etxebizitza eskubidea bermatzeko exijitu dute Eskubide Sozialen Gutunak eta AZET taldeak
Pertsona batzuk, maskara jantzita, autobusean. ©JUAN CARLOS RUIZ / FOKU

Otsailaren 8tik aurrera maskara ez da beharko Hegoaldeko garraio publikoan

Edurne Begiristain Julen Aperribai

Espainiako Osasun ministroak esan du adierazleak «oso egonkorrak» direlako kenduko dutela. Halere, osasun zentroetan eta farmazietan derrigorrezkoa izango da

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.