Afrobeat etiketapean aritzen da Jungle By Night taldea. Eta, alde horretatik, Fela Kuti aita pontekoaren ondorengoak dira Amsterdamen elkartutako gazte hauek. Talde jendetsu eta gazte honen oinarrian, ordea, estilo ugarik egiten dute bat. Jazzak agintzen du, funkak ere leku esanguratsua betetzen du, baina Jungle By Nighten proposamena berezi egiten dutenak gainerako elementuak dira: etiopiar erritmoak, turkiar psikodelia, Kolonbiako cumbia, popa... baita musika garaikidearen ukituak ere. Guztiak jendea dantzan jartzeko landuak.
Bederatzi lagun dira oholtza gainean (tronpeta, saxoa, tronboia, gitarra, teklatuak, baxua eta perkusioak), eta 2010etik dabiltza batetik bestera, hala zuzenean jotzen (Montreauxeko jazzaldian jo dute, besteak beste), nola diskoak grabatzen. Bost lan dituzte argitaratuak, horietako azkena iazkoa: Livingstone.
Musika. JUNGLE BY NIGHT
Bizitza alaitu nahi duen musika irekia
Non: Donostiako Dabadaban. Noiz: Ostiralean.
Iruzkinak
Ez dago iruzkinik
Ordenatu