Albistea entzun

Pentsioak. Erreformaren eragina Ipar Euskal Herrian

Indar handiagoa eskatu dute

Ehunka manifestari elkartu dira Angelun, pentsioen erreformaren kontrako hirugarren mobilizazio egunean. Edouard Philipperen adierazpenek mugimendua gogortzea espero dute sindikatuek

Manifestazio jendetsua egin zuten, atzo, Angelun, pentsioen erreformaren kontrako hirugarren mobilizazio egunean.
Manifestazio jendetsua egin zuten, atzo, Angelun, pentsioen erreformaren kontrako hirugarren mobilizazio egunean. GUILLAUME FAUVEAU Tamaina handiagoan ikusi

Ekhi Erremundegi Beloki -

2019ko abenduak 13 - Angelu

«Mobilizatuak eta motibatuak gaude; eguraldi txarra izanik ere jende anitz bada». Frantziako Gobernuak ezarri nahi duen pentsio sistemaren kontrako hirugarren mobilizazio egunean langileen determinazioak bere hartan segitzen duela berretsi du Samathan Hourquescos Baionako CGT sindikatuko arduradunak. Herenegun aurkeztu zuen gobernuaren proiektua Edouard Philippe lehen ministroak, eta sindikatuen susmoak baieztatu zituen: puntukako pentsio sistema ezartzeaz gain, erretreta hartzeko adina ere gibelatzea da haien asmoa. Adierazpen horiek langileen oldarraldia eragingo dutela espero dute sindikatuek, eta mobilizazioa indartzera deitu dute behin eta berriz.

Angelun (Lapurdi) egin zuten manifestazioa atzo goizean, han diren merkataritza guneak trabatzeko ideiarekin. Azken urteetan langileen protesta andana izan ditu Castorama saltegia, eta handixe abiatu ziren, eta BAB2 eta E.Leclerc merkataritza guneetara jo zuten ehunka manifestariek Pentsioak: Macron/Delevoye proiektua erretiratu. Enplegua, zerbitzu publikoak eta lansarien alde! zioen pankartaren atzetik. Baina manifestariak iristerako, zaindariek zentro komertzialak itxiak eta bezeroak kanporatuak zituzten, manifestazioa eraikin barnera sartzea ekiditeko.

Abenduaren 5ean hasi zen greba mugimendua, baina sektore gehienetan egun bakarrekoa izan zen. Garraioen eta energia arloan erabaki dute, nagusiki, greba luzatzea; trenbideetako langile batzuek bederatzigarren greba eguna izanen dute, gaur. Atzoko mobilizazioaren bukaeran hitz egin zuten, beste sektoreetako langileei inplikazio gehiago eskatzeko.

Gaur goizean, grebalarien batzarra eginen dute Donibane Lohizunen (Lapurdi), eta jakinarazi dute kopuruaren arabera ekintza bat egiteko asmoa dutela. Enedis energia enpresako langilea da Yannick —ez du abizenik eman nahi—. Abenduaren 5etik greban dira horiek ere, eta baieztatu du teknikarien artean ia langile guziek parte hartzen dutela. «Ohartzen gara gobernuak pito batzuentzat hartzen gaituela; beraz, uste dut mugimendua gogortuko dugula. Ez gara hasi, oraindik, sare elektrikoa mozten; posible da has gaitezen. [Gaur] Eta heldu den astetik goiti antolatuko gara behar dena egiteko». Herritarrak «nardatu» gabe, «gobernatzen gaituztenak» izanen dituzte jomugan, haren arabera.

«Intersindikalari hasieratik erran diogu: denak batera atera behar gara kalera», iharduki du Eñaut Aramendi LABeko koordinatzaileak. Haren iritziz, estrategia aldatu beharko lukete, eta kontsumoan gehiago eragiten hasi. «Utz diezaiogun greba egunetan kontsumitzeari; ekonomia blokeatu nahi badugu, ez da beste aterabiderik».

Herve Larrouquert FO sindikatuko departamendu idazkaria ere prest agertu da ekintzak gogortzeko, eta baieztatu du proposamena eginen duela gaur goizeko sindikatuen arteko bilkuran. Ildo beretik, ohartarazi du astelehenetik aitzina garraiolariak ere greba mugimenduan sartuko direla. Zortzi petrolio iraztegitik zazpi blokeatzeko asmoa dute.

CFDT ere grebara

Edouard Philipperen adierazpenen ondotik, greba mugimenduarekin bat egitea erabaki du CFDT sindikatu erreformistak. Puntukako sistemaren aldekoak dira, baina pentsioen erreforma erretretaren adina gibelatzeko baliatzeak haserretu ditu. Laurent Berge idazkari nagusiak heldu den astearteko greba egunean parte hartuko dutela esan du. Mobilizazioa indartzeko balio dezakeela uste badute ere, ezin erran gainerako sindikatuak anitz berotu dituenik. «Uste dut erakutsi dugula ez dugula CFDTren beharrik», adierazi du gogor Hourquescosek. «Beti ongi da langile gehiago badira mugimenduan, baina orain arte puntutako sistema babestu dute, grebaren kontrako mezuak zabalduz enpresetan».

Astearterako ezarri dute ondoko hitzordu handia. Herenegun Philippek egindako adierazpenen ondotik, sindikatu eta sektore gehiago mobilizatu eta hozka bat igotzea da anitzek egiten duten apustua. Erabakigarria izanen da mugimenduari indar berri bat eman, eta Frantziako Gobernua hertsatzeko.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

EAJko buru Andoni Ortuzar eta CEOEko buru Antonio Garamendi. ©LUIS TEJIDO / EFE

EAJk berretsi du ez duela abstentziora joko ez bada lan itunen lehentasuna aldatzen

Xabier Martin

EAJko presidente Andoni Ortuzarrek esan du ez dela egongo «abstentzio taktikorik» eta ez duela «pasatzen utziko»,  «sinplea eta erraza» delako erkidegoetako lan hitzarmenen nagusitasuna jasotzea erreforman. CCOOko buru Unai Sordok dio bi urte gelditzen direla legegintzaldian «aldaketak egiteko».

Ontzi bat Bilboko portuan sartzen ©Luis Jauregialtzo (Foku)

Esportazioak pandemia aurreko kopuruetara itzuli dira

Jokin Sagarzazu

Petrolio olio finduak, ontzigintza eta siderurgia nabarmentzen dira. Autogintzak ere gora egin du, Araban bereziki; Nafarroan, aldiz, behera.

Sidenorreko behargin bat, lanean, Basauriko fabrikan. ©MARISOL RAMIREZ / FOKU

Basauriko Sidenorren lan ituna adostu dute, eta KPItik behera igoko dituzte soldatak

Xabier Martin

LSB-USO, Senda de Ugarte, UGT eta CCOO sindikatuek 2026. urte arteko lan hitzarmena egin dute zuzendaritzarekin, eta soldatak %2,5 igoko dira aurten.

Guggenheimeko garbitzaileek Bilbon egin duten manifestazioa. ©Monika Del Valle / FOKU

Guggenheimeko garbitzaileek babesa eskatu diete hura diruz hornitzen duten erakunde publikoei

Imanol Magro Eizmendi

223 egun daramatzate greban, eta Jaurlaritzak esku hartzea erabaki du, baina, oraingoz, artekari moduan bakarrik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.