Sindikatuek bat egin dute urtarrilaren 7an Bilboko kaleak betetzeko deiarekin

ELA, LAB, ESK, Steilas, CGT/LKN, CNT, EHNE eta Hiru sindikatuek manifestazioa egin dute Donostian, Easo plazatik abiatuta, Langileok bidean gara presoak etxeratzeko lelopean. Mobilizazio horren bidez, sostengua eman nahi izan diote Sarek urtarrilaren 7rako Bilbon antolatu duen mobilizazioari. Horrez gain, salbuespenezko espetxe politikak amai daitezela ere eskatu dute sindikatuek.

Sindikatuek adierazi dutenez, presoak «etxetik gertuago» daude orain: «Hori poztekoa da, baina oraindik ere asko dira indarrean dauden salbuespen neurriak, eta beharrezkoa da lan egiten jarraitzea».

Sareko eledun Inaxio Oiartzabal ere izan da manifestazioan. Oiartzabalek goretsi egin du «espetxe arloko salbuespen neurriak behingoz amaitzearen alde dauden eragileen arteko elkarlana». Gogorarazi du gaur egun EPPK-ko hamahiru preso baino ez direla gelditzen Espainiako kartzeletan, Euskal Herrira ekarri gabe edo gerturatzea iragarri gabe, baina ohartarazi du «oztopoak» ugariak direla oraindik ere, batez ere gradu progresioaren auzian.