'Hitzekin jolasean'

Hamar kantu aski entzungarri bildu ditu Esti Markezek bere debuteko diskoan. Maitasun kantuak dira, xalotasun eder batez jantziak eta, hiru izan ezik, beste denak berak idatzi ditu, musika guztiak konposatzeaz gain. Aitarekin konpartitutako disko haren ostean, pausorik zailena ematera ausartu da: bakarkako bidea lantzera, alegia. Iker Lauroba alboan edukitzea segurtasun bermea den arren, Markezen ahotsa da protagonista hemen. Ahots goxo eta teknikoki aparta, berezkoa daukan tinbre liluragarriak janzten baititu diskoaren zirrikitu guztiak. Zer esanik ez bi ahotsetan aritzean, sortzen duen magia harrigarria baita, lanari izena ematen dion kantuan bezala. Pop-rock egitura hartzen duen momentuetan lortzen du, akaso, dirdirarik handiena; bateriak eta gitarra elektrikoak ematen dioten bizitasunak diferentzia markatzen baitu.