'All Things Being Equal'

Peter Kember musikari britainiarrak Sonic Boom bakarkako egitasmoa diseinatu zuen bere jatorrizko taldea, Spacemen 3, arrakalatzen hasi zenean. Hala, 1990ean, Spectrum itzal handiko lana argitaratu zuen. Harrezkeroztik, baina, hibernatzen egon da, Kemberrek hamaika proiektutan parte hartzen jarraitu duen arren. Bada, 30 urte igaro diren honetan, Sonic Boom bueltan da elektronika analogikoan bustitako hamar doinu berri hauekin. Diskoa sintetizadore analogikoekin eraikitako burbuila hipnotikoa da, batzuetan zaratatsua, beste batzuetan, berriz, onirikoa. Horretarako drone eta mantrekin jositako pieza luzeak sortu ditu, zeinak naturarekin lotzen diren, batez ere hitzen ondorioz. Mistikoa bezain espaziala, mendekotasuna sortzen duen zurrunbilo bilakatzen da.