Albistea entzun

Migrazioa

Aljeriako hiru gizonezko hil dira Ziburun, tren batek harrapatuta

Lehen zantzuen arabera, migrazioaren bidean zeuden. Beste lagun bat erietxera eraman dute, larriki zauriturik. Migrazio politikak gaitzesteko elkarretaratzea eginen dute gaur harrera elkarteek.
«Oztopoek arriskua errentagarri bilakatzen dute»

Ziburu eta Donibane Lohizune arteko trenbidean gertatu zen istripua, atzo goizaldean.
Ziburu eta Donibane Lohizune arteko trenbidean gertatu zen istripua, atzo goizaldean. GUILLAUME FAUVEAU Tamaina handiagoan ikusi

Oihana Teyseyre Koskarat -

2021eko urriak 13 - Baiona

Goizeko bostak, minutu bat eskas. Ordu horretan, atzo, Hendaiatik (Lapurdi) Bordelera (Okzitania) zihoan trenak lau lagun harrapatu zituen Ziburun (Lapurdi), trenbidean etzanik zeudela. Horietako hiru hil dira, eta laugarrena Baionako erietxean dago, larri. Kolpe anitz ditu gerrian eta hanketan; ebakuntza egin zioten atzo arratsaldean, eta arriskutik kanpo dago. Jerome Bourrier Baionako prokuradoreak baieztatu du migratzaileak zirela, Aljeriakoak, zehazki. Halere, biktima bakarra «ofizialki identifikatu» ahal izan dute: 21 urte zituen gizonak. Gainerakoan, lekuan berean aurkitutako dokumentazioa ikertzen ari da Frantziako Polizia.

Bourrierek istripua gertatu eta berehala ireki du ikerketa, «heriotzaren arrazoiak» zuzen zein izan diren aztertzeko. Frantziako Auzi Poliziak eta Frantziako Aireko eta Mugetako Poliziak eramanen dute ikerketa. Aitortu du lehentasuna biktimak identifikatzea dela. Izan ere, ezbeharra gertatu zen lekuan bost pertsonaren dokumentuak aurkitu ditu Frantziako Poliziak. «Ezin da erran benetan biktimenak diren ala ez, eta ezin da erran beste lagun batek, bosgarrenak, ihes egiterik izan duen», zehaztu du.

Aurkitu duten dokumentazioaren arabera, hipotesia egin du Bourrierek: «Hiru paperek Espainiako Estatuaren kanporatze agindu bat erakusten dute, eta beste paper batean ageri da Baionako Auzitegiaren kondena bat. Horretan, idatzia da herenegun Mont-de-Marsango (Okzitania) espetxetik atera zela, eta segidan Espainiaratua izan zela, Frantziaren aginduz». Hala, lehen zantzuen arabera, uste du migrazioaren bidean zeudela biktimak, Baionara iritsi nahian. «Eguneko lehen trena da ordu horretakoa. Pentsa daiteke pertsona horiek bidean lo geratu direla, baina suposizio bat da. Migrante batzuek sekulako arriskuak hartzea onartzen dute», erran du. Eta gehitu du: «Arras posible da egunean bertan muga pasatu izana».

Kontroletatik ihesi

Istripua Donibane Lohizuneko (Lapurdi) tren geltokitik hurbil gertatu zen, «batere argiztatua ez den» leku batean. Peio Dufau Ziburuko hautetsia da; ofizioz, tren gidaria. BERRIAri kontatu dio Hendaia eta Baiona arteko trenbideetan «maiz» ibiltzen direla migratzaileak. «Polizia gibeletik dute toki guztietan. Bidasoa ibaian bi ito ziren; horrek frogatzen du bide guziak hartzen dituztela mugatik eskapatzeko, Baionara iristeko. Geroz eta bide arriskutsuagoak hartzen dituzte kontrolen ondorioz: trenbidea horietako bat da. Trenbideetako langileentzat ere zaila da», salatu du. «Sekulako arriskuak hartzen dituzte, sobera kontrol badelako. Zer aldatzen du oztopatzeak? Zer aldatzen du? Hain bide luzea eginda, ez dira Poliziarengatik geldituko».

Atzo goizean gertatutakoaz ere xehetasun gehiago eman du Dufauk. «Tren gidariak ez ditu ikusi, eta larrialdiko frenatzea egiten saiatu delarik berantegi zen. Lau pertsonak zutitzen entseatu dira, baina joak izan dira. 200 bat metro egin behar izan ditu gidariak trena gelditzen lortzeko. Berehala jaitsi da trenetik, kontrolatzaileekin batera, eta lehen artak eman dizkiote bizirik zenari». Prokuradoreak zehaztu du, orduan, orduko 92 kilometroko abiaduran aitzinatzen ari zela trena.

Hendaiako, Donibane Lohizuneko eta Baionako tren gidarien CGT sindikatuak gertatutakoa salatu du. «Estigmatizazioak, arrazismoak, eta gorrotoak [Frantziako] espazio mediatikoa betetzen duten uneotan, drama honek gogora ekartzen digu, egunero, emakume batzuek, gizon batzuek, haur batzuek beren herrialdetik ihes egiten dutela gerragatik, baldintza klimatikoengatik, goseteengatik; eta bidean hiltzen direla». Ezbeharra bizi izan duten tren gidariei ere babesa helarazi die sindikatuak.

Migrazio politika jomugan

Errefuxiatuen harrera elkarteek elkarretaratzea eginen dute gaur, 18:30ean, Donibane Lohizuneko tren geltokian, etorkinek Euskal Herrian pairatzen duten egoera salatzeko, eta migrazio bideetan hil diren pertsonak oroitzeko.

EH Bai koalizioak berehala salatu du gertatutakoa. «Azken hilabeteetan errepikakorra bilakatzen ari den albiste txar bat da. Hiru migrante hil dira jada —batek bere buruaz beste eginik eta beste biak Bidasoa zeharkatzen ari zirela— eta hiru heriotza berri hauekin, orotara, sei dira Euskal Herrian hil diren migranteak».

Frantziako Estatuaren migrazio politika gaitzetsi du koalizioak. «Etorkinei harrera hobea egiteko, mugak kudeatzeko politikan jarrera hexagonala errotik aldatzea behartzen du. Badu bost urte orain Frantziako Estatuak mugetan kontrolak gogortzen dituela, Schengen eremua eta libreki ibiltzeko eskubidea urratuz». Euskal Herriak «harrera herria» izatea nahi dutela berretsi dute: «eta ez hilerria».

Jarraitu irakurtzen: «Oztopoek arriskua errentagarri bilakatzen dute»

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lehen mailako artako kontsultak atzeratuko ditu Osakidetzak

Lehen mailako artako kontsultak atzeratuko ditu Osakidetzak

Arantxa Iraola-Irati Urdalleta Lete

Osasun sailburu Gotzone Sagarduik egin du jakinarazpena: «Aparteko larritasuna ez duten» kontsultak atzeratuko dira.

Baionako txertaketa gunea, artxiboan ©Guillaume Fauveau

Pfizer dosiak ez ote diren faltako beldur dira txertaketa guneetako langileak

Oihana Teyseyre Koskarat

Eskualdeko Osasun Agentziak hobetsi du Moderna txertoak banatzea. Baionako txertaketa guneko langileek lana uzteko eskubidea aldarrikatu dute, pazienteei «gardentasuna zor» zaielakoan.

5-11 urte arteko haurren txertaketa onetsi du Espainiako Osasun Publikoko Batzordeak

5-11 urte arteko haurren txertaketa onetsi du Espainiako Osasun Publikoko Batzordeak

Arantxa Iraola-Irati Urdalleta Lete

Hilaren 15etik aurrera autonomia erkidegoek haurrak txertatzen hasi ahal izango dutela jakinarazi du

Munilla meza ematen Azpetian (Gipuzkoa), 2019an. ©Javier Etxezarreta / EFE

Donostiako apezpikutza utziko du Jose Ignacio Munillak

Paulo Ostolaza

Ia hamabi urte egin ditu karguan. Alacanteko (Herrialde Katalanak) gotzaina izango da aurrerantzean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.