Albistea entzun

Egunero elkartuko dira ESIkoak, kargugabetuak berriz integratu arte

Osakidetzako krisia dela eta, elkarrizketarako «prest» agertu da Bingen Zupiria, baina adierazi du badirela «leku egokiak» mintzatzeko, hedabideetatik kanpo
ESIko kargugabetzeen harira egindako protesta, atzo, Donostian.
ESIko kargugabetzeen harira egindako protesta, atzo, Donostian. JAVIER ETXEZARRETA / EFE Tamaina handiagoan ikusi

Oihana Teyseyre Koskarat -

2022ko abenduak 7

Krisi garaian bizi da Osakidetza, eta hautsak harrotu dituzte azken egunotako gertakariek. Izan ere, iragan ostiralean kendu zituzten kargutik Itziar Perez Donostia aldeko ESI erakunde sanitario integratuaren zuzendari kudeatzailea, eta Donostia ospitaleko mediku zuzendari Idoia Gurrutxaga. Bi kargugabetzeen ondotik, bata bestearen atzetik etorri dira dimisioak: azken orduetan, dimisioa eman dute Adolfo Begiristainek, Donostia ospitaleko kirurgia zerbitzuko mediku zuzendariordeak, Maite Martinez mediku zuzendariordeak eta Loreto Marquet erizaintza zuzendariordeak.

Denek eman dituzte arrazoi berdintsuak dimisioa emateko: desadostasun sakonak Osakidetzaren Zuzendari Nagusiarekin eta Osasun Sailarekin. Besteak beste, «goitik beherako» erabakiak inposatzea egotzi diote Osasun Sailari, eta osasun sare publikoa «era diktatorialean» kudeatzea. Egoeraren aitzinean, Donostia aldeko ESIko zerbitzuburuek erran dute elkarretaratzea egingo dutela egunero, atzo egin zuten bezala, langile kargugabetuak eta dimisioa eman dutenak berriz har ditzatela eskatzeko, eta Osakidetzari eta Osasun Sailari euren iritzia kontuan har dezatela eskatzeko.

Atzo, egoera salatzeko egindako elkarretaratzean, Arantza Aguillo Donostia ospitaleko larrialdi orokorretako zerbitzuburuak erran zuenez, Osakidetzak eta Osasun Sailak «politika bertikala» izan dute, eta leporatu die «ez dutela aintzat hartu pazienteengandik hurbil» daudenen iritzia. «ESIko zuzendaritzak entzuten gintuen», erran zuen. Basurtuko ospitaleko (Bizkaia) Basurto Bizirik langile plataformak «elkartasuna» adierazi die ohar batean ESIko langileei.

Mintzatzeko «prest»

Bingen Zupiria Eusko Jaurlaritzako bozeramaileak, atzo, krisiari aurre egiteko «eztabaidatzea» beharrezkotzat jo zuen. Aitortu zuen Donostia aldeko ESIko kargugabetze eta dimisioen ondotik, «egoera oso berezia» dela. Nolanahi ere, adierazi zuen Eusko Jaurlaritzak ez ziola «hedabideen bidez mediku talde bati erantzungo», elkarrizketa «leku egokietan» egiteko beharra berretsiz.

Zupiria: «Elkarrizketak bere bide eta toki propioak izan behar ditu, eta Jaurlaritzak konpromisoa hartzen du elkarrizketa behar den tokietan sustatzeko». Gehitu zuen, bestalde, Eusko Jaurlaritzako Osasun Sailak Eusko Legebiltzarrera joateko asmoa duela, bertan «behar diren azalpenak emateko». ESIko zuzendaritza, ordea, ez da «oso baikor» agertu Aguillok aitortu duenez, nahiz eta «elkarrizketarako prest» izan.

Izan ere, herenegun, Gotzone Sagardui Eusko Jaurlaritzako Osasun sailburuak «antolakuntza aldaketa» soiltzat jo zituen kargugabetzeak, baina ez zuen zehaztu zein diren zuzendaritza aldatzea beharrezko egin duten gertaera horiek. «Arduradun aldaketak sarri gertatzen dira, ohikoa da», gaineratu zuen. Gero, kargutik kentzeko erabakia Osakidetzaren «proiektu komunari buruzko ikuspegiarekin bat ez zetozelako» hartu zela onartu zuen.

UGT sindikatuko bozeramaile Raul Arzak, bestalde, erran zuen egunotako egoerak ez dituela «harritzen». Hala eta guztiz ere, Osakidetzari eta Eusko Jaurlaritzako Osasun sailari «negoziatzeko jarrera» har dezatela eskatu zien.

Jardunak segitzen du

Egoera ikusirik, ESIko zerbitzuburuek «lasaitasuna» helarazi nahi izan zieten atzo pazienteei, ohar baten bidez. Gorabeherak gorabehera, pazienteen asistentzia eta ohiko jarduerak segurtatuta daudela baieztatu zuten. Honela mintzatu zen Aguillo atzo egindako elkarretaratzean: «Helarazi nahi dugun mezua hau da: hemen jarraitzen dugu, lanean jarraitzen dugu, eta kargugabetutako zuzendaritza berriz onartzeko eskatzen jarraitzen dugu».

Gisa berean mintzatu zen anestesia zerbitzuko buru Nuria Gonzalez ere. Egoerak «pazienteengan eta haien senideengan ziurgabetasun handia» sortzen duela deitoratu zuen. Hala, medikuntza jardunari buruz argi mintzatu zen: «Ez dugu ezer etengo, ez dago ezer egingo ez denik, eta ez da ebakuntzarik atzeratuko».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Sindikatu Medikoko kideak, atzo, greba hasi aurreko elkarretaratze batean. ©VILLAR LOPEZ / EFE

Ultimatuma eta greba hotsak

Ion Orzaiz

Sindikatu Medikoak ezezko borobila eman dio Nafarroako Gobernuaren eskaintzari, eta grebari eutsi dio. Eskaerak: soldata igoera handiagoa, esklusibotasuna eta gobernuaren solaskide bakarrak izatea
Mutilentzat bakarrik den Erain ikastetxea, Irunen (Gipuzkoa), artxiboko irudi batean. ©GORKA RUBIO / FOKU

Jaurlaritzak ituna eten egingo die sexuka bereizten duten eskolei

Edurne Begiristain

Hurrengo ikasturtetik aurrera kenduko zaie finantzaketa. Bildarratzek esan du «ahalik eta modu adostuenean» egin nahi dutela prozesua, eta ikastetxeekin harremanetan direla
 ©JON URBE / FOKU

«Diktaduraren aurkako indarkeria kondenatu beharra ez dut ulertzen»

Xabier Martin

Frankismoak 1960tik 1975era Gipuzkoan eragindako biktimak identifikatzeko ikertzen aritu da. Uste du erakunde batzuk«deseroso» daudela ETA sortu zeneko aro historiko horri erreparatzean.
Presoak desfilatzen, 1960ko hamarkadan, Langraiz Okako espetxean (Araba); Alfer eta Gaizkileen Legearen arabera kartzelatu zituzten horietako asko. ©JAVIER GOMEZ

Moral bikoitzak kondenatuak

Iraia Vieira Gil

'Alferrak eta gaizkileak' izateagatik atxilotu zituztenak omentzeko erakusketa bat egin du aldundiak Gasteizen. Orduan ahotsik izan ez zutenei lekua eman nahi izan diete gaur.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...