Verde praton koplatan

U daberri giroak Samiñopeko Pagotxeta inguruetara eraman nau, pauso pausatuz, mozal aroaren itomenetik arnas egurastera. San Kristobal baselizaren ingurumarian kanturako gogoa sartu zait, ibilian nabilela sarri bezala. Miren eta Roberto Etxebarriaren Hamaikatxo kopla pandero baten konture... etorri zait akordura. Sakelakoa atera eta eurekin batera abestu ditut bakan batzuk, ahots goran: «...Ortuan perejila saleruan gatza, atera platerera jan daigu legatza». Iazko urte hondarrean kaleraturiko lanak apenas izan duen oihartzunik, ez merezitakoaren laurdenik.

Neure kantaera txarraren oihartzunarekin egin dut beherantz, Olarte errekastoari segika. Harrizko zubitxo baten abaroan topatu dut zelaitxo berde bat. Azken egunetan gehien entzun dudan musika Verde Pratorena da. Etzan naiz, belar lasto bat ahoan, Iron And Wine-ren Our Endless Numbered Days disko ahaztuxe gogoangarriko azalaren gisan. Errekaren xuxurlarekin bat, erreskadan entzun ditut Amaren kanta lehenengotik hasita, Neskaren kanta zazpigarreneraino... Tartean, bizpahirutan, Haurraren kanta itzela.

Nire baitan bi-biek oihartzun parekoak sortu dituzte, nola Etxebarria aita-alaben kopla kantuek, halatsu Ana Arsuagaren kantu hetereo bezain lurtarrek. Estetika, lengoaia desberdina darabilte, konforme, baina bi-biek edaten dute musika herrikoiaren errekatik, folk garaikidea eginez. Verde Pratok elektronika sotilez jantzi ditu kantuok, trikitilariek pandero hutsez eman dituzte piezatariko batzuk, Galiziako pandereteiren estiloan, gurean ez hain molde ohikoan.

Esperimentalaren izenondoa jarri diote Verde Pratoren lanari hainbat lekutan. Ez dakit ondo zergatik. Bi proposamenetan esperimentalagoa zein den ere zalantzak ditut, baina ez da transzendentea, inondik ere.

Esperimentala, benetan, belazean eserita bi-biok entzutea da; braustakoan ideia esperimental bat etorri zait kaxkondora. Zergatik ez elkarrekin programatu biak; Donostiako Dabadaba batean, Aristerratzuko erromerian bestean.

Esperimentala ez, askorentzat surrealista zeharo, akaso. Duela urtebete zendutako Rafael Berrio handiak kantatu bezala, «Neuk ulertzen dut esan nahi dudana».