BI AHOTSETARA

«Estrogeno pixka bat»

Gorka Erostarbe -

2019ko maiatzak 5
Musikak asko baitu jarreratik; ez gara ezer berria esaten ari. Baina zenbaitetan, gehientsuenetan, jarrera estereotipatu batekin lotu izan baita zuzeneko emanaldien jarduna, rockaren esparruan, batez ere.

Zutabe honetan bertan goratu genituen Atom Rhumbaren zuzenekoen berezitasuna eta indarra; eta nabarmendu genuen faltsetean abestearen ederra, gizonezkoen ahots estandarra zalantzan jartzen duelako, beste erregistro batzuk ekarri eta sinbolizatzen dituelako, sarriegi gizontasunarekin kontrajarri izan direnak.

Eta, hara hor, oraintsu berriz ere Rhumberoak ikusteko aukera, Oñatiko Beratu jaialdian, eta ezusteko desatseginak non kolpatu gaituen. Hain zuzen ere, rockaren jarrera estereotipatuenak, halako gizonkeria batekin lotu izan direnak, erreproduzitzen ikusi ez genituen bada!

Gaitzesgarria ez da oholtzan kementsu ez ezik nahi bada oldarkor agertzea ere... ugariak dira hunkidura, alaitasuna, amorrua, ezina agertzeko moduak. Izan liteke egun txar bat agertoki gainean, jakina, baina ulertzen zail da oraindik ere, gitarraren pedalen soinuarekin asmatu ez eta tramankulua txikitu arte ostikatzea amorruaren amorruz; apurtutako kableetako bat jendartera botatzea. Errazagoa zatekeen mikrofonotik esplikatzea zein zen arazo teknikoa, esaterako, ezen, eta ez kantariak egin bezala, soinu egokia ez izatearen errua egun horretako ordu aldaketari egoztea, eta bertaratu zirenei modu zakarrean, marmar jarioan, hitz egitea...

Rhumberoak laudatzean gogoratu genuen Iñigo Cabezafuego kidearen esaldi bat: «MC5, The Stooges... gutxiago eta Prince gehiago». Oñatiko kontzertuan ere Cabezafuegok berak izan zuen jarrerarik errespetagarriena ez ezik argitsuena ere. Taldekideei begira honako hau bota zien: «Tira, pedalik edo kablerik gabe, baina jo dezagun, jendea horren zain dago eta. Agian, estrogeno pixka bat gehiago jarri beharko genuke...».

Ez baita oro testosterona, ezta rockean ere.

Talde handia da Atom Rhumba zuzenean, baina dena ez da testosterona, dena soinu eta teknika ez den moduan. Publikoak eta Beratu jaialdiak berak besterik merezi zuten.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna