Albistea entzun

BI AHOTSETARA

Flamenkoa (eta II): sua

Gorka Erostarbe Leunda -

2022ko otsailak 27

Trenean iristen nintzen Andoainera. Egun dagoen leku berean zegoen lantokia, geltokitik berehalaxe. Geltokiaren eta lantokiaren tartean, errepidearen albo-aboan, Txitxarrain baserria, eta bertoko amona sarri etxe parean eserita, edo baratzean, lanean pauso txikian. Gustatzen zitzaidan egunoroko postal hori, joanekoan. Itzulera ere trenean egiten nuen; bederatzi bat ordu beranduago, eta sarri denboratxoa egin behar etxeratuko ninduen trenaren zain: ai, baina, itxaroteak hainbesteko ernegurik sortzen ez zigun garai haiek!: itxaronaldiak ekar zezakeen asperdura, are gogaitzea, baina ekar zezaken ezusteko ederrik ere, bizi eta soinu taupada moldean.

Ijito komunitate bat bizi zen geltokiaren atzealdean; ez nituen goizez ikusten. Saguxarren gisara ateratzen ziren gauean; udaberritik aitzina pizten zuten sua, biltzen ziren haren ondoan, helduenek kantatu eta palmeoak egiten zituzten... txikienek suaren jiran jolastu, jauzi, dantza... Eta neu urrun samarretik begira hasieran, herabe, voyeur lotsati baina kuxkuxero; su eta doinu haiek limurtuta, pixkana hurbilduz joan nintzen, harik eta gau udatiar batean neskato bat hurbildu eta ozen gaztigatu zidan artean: «Payo, lasai, etorri eta kantatu...». Gainerakoak ez ziren ohartu. Neu ez nintzen gehiago hurbildu. Baina egunero ez bazen ere, sarri-sarri, etxeratuko ninduen trenaren zain, begi-belarriak erne jartzen nituen, suaren inguruan elkartzen ziren haiei begira, haien kantu, irri, aiene eta dantzei adi.

2001 ingurua izango zen; ordurako musikak bizi ninduen, idatzi ere idazten nuen musikaz. Egunkaria-ren Munduko Musikak bildumako flamenkoaren zenbakiak egina zidan atzimur: geltokiko kantu haietako batean, hain zuzen ere, Remedios Amayaren «ay tus labios pa mí, turú-turai...» entzun uste izan nuen, baita Camaronen pare bat ere.

Geltoki atzealde horretan bizi izandakoak musikaren beste dimentsio bat erakutsi zidalakoan naiz; ordura arte, umetan ez bazen, erreparatu gabekoa; disko, kontzertu, aldizkari, metaerreferentzia eta abar kontsumofiliko luze horretatik kanpokoa, lurtarrago bat, geltoki zaharretako suak ekarria-edo.

Sua piztu, aulkiak jarri, bildu eta kantatu. Hori ere izan da flamenkoa niretzat.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Larunbatean hasiko da <em>Bizirik</em> lanaren aurkezpen bira, Donostiako Dabadaba aretoan. ©BENGO

Norbere burua barkatu artean

Uxue Rey Gorraiz

Aitor Bengoetxea 'Bengo' musikariak lehenengo lan luzea eman du: 'Bizirik'. Zortzi kantu bildu ditu; hiru kolaborazio tartean. Larunbatean hasiko du kontzertu bira, Donostian

Inauteri giroan murgilduko du herria festibalak. ©GUILLAUME FAUVEAU

Inauterietako dantzak eta musika batuko ditu Hartzaro festibalak

Berria

Otsailaren 10etik 21era egingo dute Uztaritzeko jaialdia, udaberriari ongietorria emateko asmoz

Rakel Esparza, Juan Mari Aburto, Fernando Perez eta Barbara Epalza, gaur goizean, Bilboko Azkuna Zentroan, urteko programazioa aurkezten. ©AZKUNA ZENTROA

Zortzi erakusketa hartuko ditu aurten Bilboko Azkuna zentroak

Olatz Enzunza Mallona

Erakusketez gainera, beste 200 jarduera baino gehiago programatu dituzte.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.