Blur 2023

Ennio Flaiano italiarra idazlea eta gidoilaria izan zen, eta zinema kritika ere egin zuen. Fellinirekin lan egiteaz gain, aforismoaren arloan maisua zen. Ironiarekin hitz egiten zuen eta askotariko gogoetak bildu ditu bere liburuetan. Nire faboritoa honako hau da, ziur: «Urtaro bakarra dago, uda, hain ederra non besteak inguruan dabiltzan». Ai, uda. Laino beltzak uxatzen dituen garaia. Denbora geratu egiten da. Mikolapiz, Calippo eta Drakula izozki industrial vintageak. Donibaneko txiringitoa. Ezkutuko hondartzak, biluzik bainatzeko putzuak. Lilura eta berritasuna eragiten dizkiguten amodioak. Ekainean hasi eta iraila amaiera arte luzatzen den txikle gustagarria da udara.

Flaianoren garaian ez bezala, musika festibalen aroan bizi gara aspalditik. Udan ospatu ohi dira jaialdi gehienak. Primavera Sound erraldoi, amaigabe eta eklektikoa da denboraldiari hasiera ematen dion ekitaldia. Aurtengo edizioa maiatzaren 31tik ekainaren 7ra egingo da Bartzelonan eta, lehen aldiz, Madrilen. Blur taldearen itzulera da 2023ko Primaverako berri esanguratsuenetako bat, eta seguru inoiz baino jende gehiago bilduko dela. Guztira 500.000 zale elkartu ziren iaz Forumeko parkean, ehunka emanaldi eginda. Atera kontuak.

2004an ilusioz beterik joan nintzen bertara lehen aldiz, besteak beste, Pixies, Primal Scream, PJ Harvey, Franz Ferdinand eta Wilco ikusi ahal izateko. Beste mundu bat zen hura. Asko jota, 15.000 lagun sartzen ziren Poble Espanyol izeneko esparru irekian. Milaka ginen, bai, baina ez zen buffet libre inozoa. Ez zen megazentro komertzial bat. Zuzeneko musika, droga legalak (eta ilegalak) eta melomanoak. Garai hartan indie peto-petoa nintzen: Adidas zapatilak eta jertsea, Levi's galtzak eta Fred Perry poloa. Hondarribiko Damon Albarn. Oraindik ere Blur maite dut. Baina niri ez zaizkit makrofestibalak interesatzen. Nik askoz nahiago ditut betiko udarak, Ennio Flaianorenak.