Albistea entzun

Kalean da Josu Urrutikoetxea

Atzo goizean atera zen Parisko La Sante presondegitik, herenegun epaileak baldintzekin aske uztea onartuta. Irailaren bukaeran itzuli beharko du auzitegietara, bere kontrako prozedurak direla eta. Bideoa albistearen amaieran.

Josu Urrutikoetxea zeraman autoa, atzo, Parisen.
Josu Urrutikoetxea zeraman autoa, atzo, Parisen. FERNANDO PEREZ / EFE Tamaina handiagoan ikusi

Ekhi Erremundegi Beloki -

2020ko uztailak 31 - Paris

Auto beltz bat, Parisko La Sante presondegitik ateratzen, herritar talde batek kazetariengandik babesten zuela. Irudi hori eman zuen, atzo goizean, Josu Urrutikoetxea ETAko kide historikoaren askatzeak. Segundo gutxi batzuk iraun zuen: presondegiko ate handia ireki, eta autoa karrikan urruntzeko denbora. 10:30 alderako iritsi zen Laure Heinich abokatua kartzelara, eta ordu laurden berantago atera zen, euskal presoa ondoan zeramala. Aterki beltz batzuekin gorde zuten autoa, argazkilari eta kameren bistatik gordetzeko. Bazterrak nahasi gabe, diskrezioz antolatu nahi izan zuten Urrutikoetxearen ateratzea, eta hala izan zen. Orain, libre aurkeztuko da Frantziako auzitegietan izanen dituen ondoko hitzorduetara.

Parisko Dei Auzitegiko instrukzio ganberako epaileak bezperan eman zuen Urrutikoetxea presondegitik ateratzen uzteko erabakia. Defentsa abokatuen eta fiskalburuaren eskaerari erantzunez, Urrutikoetxea presondegitik ateratzea onartu zuen, uztailaren 1eko auzi saioan hartutako erabakia berretsiz. ETAren ordezkari ohiak eskumuturreko telematikoa eraman beharko du, eta herritar batek Paris erdigunean utzi dion etxebizitza izanen du obligaziozko bizilekua. Ordutegi jakin batzuk izanen ditu etxetik ateratzeko, eta debekatua izanen du Frantziako Estatuaren menpeko lurretatik ateratzea.

Iazko maiatzaren 16an atzeman zuten Urrutikoetxea, Frantziako Alpeetan. Dei Auzitegiak berak iazko ekainaren 19an kontrol judizialpean Urrutikoetxea libre uzteko erabakia hartu zuen, baina, Madrilek eskatutako euroaginduak tarteko, Frantziako Poliziak orduan bertan atxilo hartu zuen berriro, artean La Sante espetxean zela. Ekainaren 19ko saioaz geroztik, Dei Auzitegiak eta Kasazio Auzitegiak lau aldiz ukatu dute askapen eskaria. Urtebete pasa eman du auzitegira joan-etorrika, atzo goizean baldintzapean aske utzi zuten arte. Bi hilabeteko pausaren ondotik, irailaren 30ean itzuli beharko da Parisko Dei Auzitegira.

Hurrengo auzibideak

Amaraun judiziala da Josu Urrutikoetxearena. Bi prozedura ditu Frantzian, eta lau eskaera egin ditu Espainiak, ETAko kide historikoa haien esku utz dezaten.

Frantziako prozedurei dagokienez, heldu den urriaren 19an eta 20an Parisko Dei Auzitegira deitua da, 2005-2006ko prozesuan ETAren zuzendaritzako kidea izatearen akusaziopean epaitua izateko. Urriaren 21ean eta 22an, haatik, Parisko Auzitegi korrekzionalera joan beharko du. Han, 2011-2013an Osloko elkarrizketa mahaian ETAren ordezkaritzako kidea izatearen akusaziopean epaituko dute. Frantziako bi prozeduretan, epaiketa bitartean libre geldituko zela erabaki zuten epaileek.

Espainiako prozedurena konplikatuagoa da. Bi estradizio eskaera egin ditu Espainiak, eta beste bi euroagindu eskaera. Estradizio eskaera bat Zaragozako (Espainia) kuarteleko 1987ko atentatuagatik da. Dei Auzitegia eskaeraren alde azaldu zen, eta defentsak kasazio helegitea aurkeztu zuen. Oraingoz ez da datarik zehaztua ebazpenarentzat. Bigarren estradizio eskaera Luis Hergetaren hilketari (1980) dagokio. Irailaren 30ean aztertuko dute Parisko Dei Auzitegian. Defentsa abokatuek behin eta berriz aldarrikatu dute preskripzio epea iragana dela, eta beraz, ezin dutela kasu horregatik Urrutikoetxea Espainiaren esku utzi. Iazko azaroan, Laurent Pasquet-Marinacce defentsa abokatuak auzitegiari azaldu zion hilketa hura ETApm-k bere gain hartu zuela, eta Urrutikoetxea ez dela sekula erakunde horretako kide izan: «Frantziarrek ETAren historiaz duten ezjakintasuna baliatzen dute espainiarrek halako aurkezpena egiteko». Horregatik, Pasquet-Marinaccek gehitu zuen ez dagoela «elementu bakar bat ere» Urrutikoetxea atentatu horrekin lotzeko.

Euroaginduei dagokienez, joan den uztailaren 1ean Dei Auzitegiak atzera bota zuen Barajasko T4ko atentatuagatik (2006) Madrilek egindako eskaera, zehaztasun faltagatik. Gizateriaren aurkako krimena egotzi nahi zioten Urrutikoetxeari Espainian. Lehen aldia izan zen Parisko auzitegi batek euroagindu bat baztertu zuena. Heldu den irailaren 30ean, herriko tabernen auziari begira Espainiak egindako euroagindu eskaeraren erantzuna emanen dute.

Herenegun, espainiar autoritateen kontra egin zuen Pasquet-Marinaccek auzitegian, beste behin, eta nabarmendu haien «errua» dela Urrutikoetxearen aurkako prozedurek hartu duten «beranta». «Eskaera herrenak dira, ez dira oinarrituak», adierazi zuen.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lau kideak hil zituzten gunea, Pasai Donibanen. ©Andoni Canellada / Foku

Pasaiako sarraskiko poliziak identifikatzeko saio bat egingo dute

Xabier Martin

Komando Autonomoetako lau kide hil zituzten polizia operazio horretan, eta idenfikazio proba batera deitu du epaileak lekuko bakarra: Joseba Merino. Martxoaren 28an du ordua, Donostiako epaitegietan.

 ©IÑIGO URIZ / FOKU

«Gure erronka da nola lotu nazio proiektua oraingo borrokekin»

Joxerra Senar

Hiru urteko etenaldiaren ostean, Plaza Hutsa egingo du Sortuk Burlatan bihar. Militantziaren bilgune horretan, herrigintzari buruz gogoeta egin eta ildo bat ezarri nahi diete aurretik ezarritako sei eremu estrategikoei.
Dozenaka jende agertu zen atzo Baionako auzitegi aitzinean, auzipetuei sostengua erakustera. ©GUILLAUME FAUVEAU

Martxoaren 9an emango dute 11 'bakegileren' inguruko deliberoa

Ekhi Erremundegi Beloki

Hamar auzipeturentzat 950 euroko isuna eskatu du fiskalak, gibelapenarekin. Uztailaren 23ko protestetan autobidea blokeatzea egotzita epaitu dituzte. Ekintza justifikatu dute guziek

Iratxe Sorzabalen zauriak, 2001eko atxiloaldiaren ostean. ©Berria

Iratxe Sorzabalen kontrako zigorra berretsi du Auzitegi Gorenak, torturak ukatuta

Berria

Euskal preso horrek pairatutako torturen berri eman izanak ez du «egiaztatzen» halakorik sufritu zuenik, Gorenaren arabera.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.