LARREPETIT

Jokuaren errenta

Iñigo Aranbarri -

2018ko uztailak 29
Onena izan gabe, Jokua ez da errenta da, seguru asko, Antonio Maria Labaienen antzezlanik sonatuena. Bertan, bi mundu ditugu begiz begi. Gizonak korrika-apustuen bueltan dabiltzan artean daukatena eta ez daukatena jokatzen, emakumeek kontrapisua dakarkiote gizonkeriazko munduari. Jokoaren burugabekeriaz ohartarazi nahi dituzte etxekoak, arriskutik urrundu, nola ez, gainera, bi gazteren ezkontza asmoa dagoela tarteko.

Kasualitateak zer diren. Ehunka lagun atera dira kalera apostu-etxe bat irekitzera doazelako Labaienen komedian ere trabes-toki den Azpeitian. Oso ohikoa ez den protesta bat non eta (aizkolariak ez badira korrikalariak, harri-jasotzaileak ez badira ahariak), hedabide publikoetatik ere denok nazkatu arte bihurtu digutenean herria bera, zezen-plaza polibalentea dela aitzakia, lehia garbiaren eta apostu himalaisten irudi.

San Inazio bezperetako kezka mamituak buelta polita ematen diolakoan nago Labaienek modu primarioan planteatzen digun egoerari. Jokua galgarri gertatzeak moral kristautik izan dezakeena gaindituta, dimentsio sozial eta ekonomikoa ezarri dio kritikari. Hau da, batzuen bulkada kontrolaezinaren lepotik ari direla besteak gizentzen. Biktima babesgabeak eta sai antolatuak, zapalketa klabean azalduta, droga trafikoarekin pareka daitekeen identifikaziora garamatza salaketak.

«Iru ekitaldiko komeria» moduan aurkeztu zuen bere obra Labaienek. Komedia, azken batean, gazteen maite-istorioa gailentzen zaiolako gizon mandotuen jokorako grinari. Ez ziola benetako gaiari heldu, alegia. Azpeitiko protestak, aldiz, gutxi du komediatik. Ludopatia agenda politikoan sartuta, ergelena litzateke pentsatzea apostu-etxeei lizentzia ukatuta amaituko denik arazoa.

Kinielatik loteriara, eliteko kirolarien publizitatetik tabernetako makinetara, a zer bonba, Labaienek bezala iskin ez egitera, aulki azpian jarri digutena.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna