Corbynek laboristen arteko oreka bilatuko du alderdiaren kongresuan

Balizko hauteskunde orokorretan eta 'brexit'-ari buruzko bigarren galdeketan izan beharreko jarrerez eztabaidatzen hasi dira. Buruzagiak lau puntuko bide orri bat proposatu du datozen asteetarako
Jeremy Corbyn laboristen buruzagia, herenegun, klima larrialdiaren kontrako protesta batean, Londresen.
Jeremy Corbyn laboristen buruzagia, herenegun, klima larrialdiaren kontrako protesta batean, Londresen. WILL OLIVER / EFE Tamaina handiagoan ikusi

Ander Perez Zala -

2019ko irailak 22

Iritsi zaio garaia Jeremy Corbyni: 2016ko erreferendumaz geroztik jarrera anbiguoa izan du brexit-aren inguruan, eta modu batera edo bestera lortu du jarrera finko bat izateko presioak saihestea. Horrek, baina, haserre handia eragin du Alderdi Laboristaren barne sektoreetan, eta zatiketa handituz joan da hilabeteek aurrera egin ahala. Inkestek aurreikusten dioten porrotak eta barne presioek bultzatuta, laboristen buruzagiak bigarren galdeketaren defentsara bideratu du jarrera, nahiz eta hasiera batean ez zen horren aldekoa. Orain, hauteskundeak berehalakoak direla aintzat hartuta, Corbynek berebiziko une baten aurrean ikusi du bere burua: alderdiak urteroko konferentzia hasi zuen atzo, eta, asteazkenera arte, alderdikideek boz horietan eta etor litekeen bigarren galdeketan izan beharreko jarreraz eztabaidatuko dute. Talka erraldoia izan daiteke.

Laboristen buruzagiak ez du egiteko samurra: kongresu amaierarako manifestuari laurogei emendakin aurkeztu dizkiote jada, eta barne sektoreak borroka betean ari dira euren jarrera inposatzeko, alderdiarena izan dadin. Horien artean daude, besteak beste, alderdiak Europako Batasunean (EB) geratzea defendatu behar duela uste dutenak.

Oreka bilatzeko, eta orain arteko anbiguotasunari heltzeko, Corbynek lau puntuko bide orri bat proposatu du. Lehen partea hil honetan abiatu du, oposizioko gainontzeko alderdiekin itunik gabeko irteera lege bidez blokeatuta. Hurrengo biak gauzatzeko, boz orokorrak egin beharko lituzkete: horiek irabazi, Bruselara joan, eta akordio berri bat negoziatzeko asmoa du, Erresuma Batua aduana batasunean geratzeko eta merkatu bakarreko arauekin lotura izateko.

Hortaz, azken pausoa bigarren erreferenduma egitea litzateke, herritarrek bi aukeren arteko hautua egin dezaten: hark negoziaturiko itun berria, edo EBn geratzea. Kasu horretan, zer egingo luke Corbynek? Lehen ministro gisa, neutrala izan, eta kanpainan ez parte hartu. Estrategia horrekin, laboristen buruzagiak alderdiko sektoreen eta boto emaileen arteko orekari eutsi nahi dio.

Alderdikideen baiezkoaren zain, kanpoan beste arazo politiko bat du Corbynek, liberal-demokraten presioa erabatekoa baita. Alderdi horrek konferentzia izan du asteon, eta, Jo Swinson buruzagi berriak proposatuta, indar politiko horren helburu bilakatu da Erresuma Batuaren irteera gelditzea; kongresuaren aurretik, alderdiaren lehentasuna zen bigarren galdeketa egitea, hitzordu horretan EBn geratzearen aldeko kanpaina egiteko. Konferentziaren ostean, irteera prozesua gelditzea izango litzateke balizko gobernu liberal-demokrata baten lehen erabakia.

Jarrera berri horri esker, inkestek beherakada bat aurreikusi diete laboristei, eta, You Gov etxearen arabera, boto gehien lortuko lituzketen indarretan hirugarrena izango lirateke (%21), kontserbadoreen (%32) eta liberal-demokraten (%23) atzetik.

Hasiera gatazkatsua

Brightonen (Ingalaterra) abiaturiko konferentziak ez du hasiera erraza izan. Jon Lansman Momentu taldeko kideak —Corbynen gertukoak dira buruzagiorde kargua kentzeko mozio bat aurkeztu zuen atzo, baina horren atzean zegoen helburua Tom Watson egungo karguduna botatzea zen, azken hilabeteotan Corbynekin kritiko izan den politikaria.

Watsonek defendatu du bigarren galdeketa bat egin beharko litzatekeela hauteskunde orokorretara deitu aurretik, eta horrek guztiz talka egiten du buruzagiaren jarrerarekin. Ordea, barne gatazkak ez sakontze aldera, laboristen buruzagiak mozioaren bozketa blokeatzea erabaki zuen.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Ramontxu Berri tabernan egondako 683 laguni egin ziete proba, atzo ©Gorka Rubio / Foku

Hego Euskal Herrian, 492 positibo

Berria

Pertsona bat hil da Nafarroan, uztailaren 15etik lehena. Uztailaren 27tik abuztuaren 3ra Galdakaoko Muguru tabernan izan ziren 420 laguni PCR proba egingo diete, eta Donostian PCR-ak egiten jarraituko dute Ramontxu Berriko bezeroei.

Iñigo Urkullu Eusko Jaurlaritzako lehendakaria, iragan astelehenean, Gasteizen ©Jaizki Fontaneda / Foku

«Erantzukizunerako» deia egin du Iñigo Urkulluk

Joxerra Senar

Sare sozialetan zabaldutako ohar batean, Eusko Jaurlaritzako jarduneko lehendakariak ohartarazi du «denen artean ahal den guztia» egin behar dela lehen olatuan bizitako egoera dramatikora ez itzultzeko.

 ©ARITZ LOIOLA / FOKU

Eragile guztiekin biltzeko eskatu dio oposizioak Eusko Jaurlaritzari

Olatz Esteban Ezkati

538 positibo atzeman dituzte Hego Euskal Herrian, iragan astean halako bi. Ospitaleratzeak ere bikoiztu egin dira egun batean: 103 pertsona daude erietxean.

 ©RAUL BOGAJO / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna