Kultura

Uraren kultura, ardoaren kultura, ondo jatearen kultura. Dietaren kultura eta baraualdiarena. Gosearen kultura. Argaltasunaren kultura, koipekeriarena eta kafe onarena. Kale zurrutaren kultura, jaiaren kultura, bestondoaren kultura, zezenarena, zezen suzkoarena eta sokakoarena. Zaborraren kultura, birziklatzearen kultura, erraustearen kultura.

Sexuaren kultura, prostituzioaren kultura eta pornoarena. Kontsumoaren kultura. Tupperren kultura, garapen iraunkorrarena eta dekadentzia jasangarriarena. Abiaduraren kultura. Berehalakotasunaren kultura. Zoriontasun behartuaren kultura eta behartsuen zorionarena. Plazeraren kultura. Turismoaren kultura. Aisialdiarena eta haizealdearena.

Zaintzaren kultura, zaintza ezarena eta zaindu ezinarena. Etsipenaren kultura. Damuarena. Ahanzturaren kultura. Indibidualismoarena eta lasterketarena. Lehiaren kultura. Txapeldunen kultura. Autopromoaren kultura. Auzolotsaren kultura.

Lanaren kultura. Ahaleginaren kultura, ekintzailetzarena, sakrifizioarena eta basque way of life-rena. Aurrezkiaren kultura eta jabetzaren kultura. Pazientziarena eta ongizatearena. Pelotazoaren kultura. Ametsaren kultura, sariarena eta gainsariena. Duintasunarena.

Entzutearen kultura, elkar ulertzearen kultura, kultura demokratikoa. Errespetuaren kultura, hierarkiarena, oligarkiarena, monarkia jatorrena eta jan-txakurrena. Gorrotoaren kultura, diferentziaren kultura. Herrikultura. Bakearen kultura eta harrikultura, legalitatearena eta indarraren monopolioarena. Beldurraren kultura.

Distantziaren kultura.

Kultura: besteak beste, gizatalde baten ohitura eta usadioen multzoa. Kulturaren funtziorik behinena taldearen biziraupena bermatzea eta gizabanakoak inguruan egokitzen laguntzea da.

Murrizketen kultura. Urrikultura. Pribatizazioarena. Oligopolioen kultura, plutokraziarena. «Kultura aldaketa». Agintearen neohizkeraren kultura