Albistea entzun
Emakumeen aurkako indarkeriari ez
Emakumeen aurkako indarkeriari ez
Emakumeen aurkako indarkeriari ez

«Bloke historiko bat» osatuz herria «eraikitzera» deitu du EH Bilduk

Milaka pertsona batu dira Bilbon, koalizioak independentziaren alde antolatutako manifestazioan. «Nazio feminista, sozialista, burujabea, ekologista eta parekidea» aldarrikatu du Arnaldo Otegik
Manifestazio handien itxura berreskuratu zuen atzo Bilboko Autonomia kaleak.
Manifestazio handien itxura berreskuratu zuen atzo Bilboko Autonomia kaleak. ARITZ LOIOLA / FOKU Tamaina handiagoan ikusi

Maite Asensio Lozano -

2021eko azaroak 21 - Bilbo

«Independentismoa ahul dagoela esaten diguten honetan, garbi utzi diegu erratuta daudela». Garazi Perea EH Bilduko militantearen hitzek ondo laburbildu zituzten atzo arratsaldean Bilbon batutako milaka lagunek ahotan izandako iruzkinak. Aurreikuspenak gaindituta, Euskal Herriaren independentziaren aldeko manifestazio oso jendetsua egin baitzuen koalizio abertzaleak. Burujabetza grina berretsita eta giharra erakutsita, asmo horretan pausoak emateko premia nabarmendu zuen Arnaldo Otegi EH Bilduko koordinatzaile nagusiak: «erresistentziatik askatasunera» jauzi egin, «bloke historiko bat» osatu, eta herria «eraldatu eta eraikitzera» deitu zuen.

Pandemia aurreko manifestazio handien itxura hartu zuten Bilboko kaleek atzo arratsaldean. Mobilizazioa hasi baino ordu erdi lehenago jada ehunka pertsonak hartuak zituzten Casilla inguruak, eta martxa abiatu zenerako Autonomia osoa jendez beteta zegoen. 70 autobus baino gehiago iritsi ziren Euskal Herri osotik, antolatzaileen arabera. Manifestarien artean ziren koalizio abertzalearen ehunka kide eta hautetsi, ikurrinak eta Nafarroako banderak eskuan hartuta, eta bularrean mobilizazioaren leloa itsatsita: Aske eta berdinen Euskal Herria lortu arte.

Txoria txori abestiaren doinuarekin agertu ziren EH Bilduko buruzagiak eta manifestazioaren sustatzaileak Casillara; besteak beste, Arnaldo Otegi, Sonia Jacinto, Garikoitz Mujika, Bakartxo Ruiz, Maddalen Iriarte, Mertxe Aizpurua, Edurne Brouard eta Izortze Santin. Zain zeuden ehunka lagunen txaloak jasota, pankarta zabaldu zuten eta irrintzi artean egin zituzten lehen urratsak. Aldarte onean igaro zen martxa, independentziaren eta euskal presoen aldeko oihuak hauspotuta, eta jendetza bildu izanaren poztasunak piztuta.

Arnaldo Otegi ere itxaropenez eta baikortasunez mintzatu zen Bilboko udaletxearen aurrean egindako ekitaldi politikoan. Egungo gizartearen «erronka handiez» jardun zen, baina horiei aurre egiteko gai izango den herri bat irudikatu zuen: «Nazio feminista, sozialista, burujabea, ekologista, parekidea».

Hain zuzen, «euskal nazioa» izan zuen hizpide Otegik une oro: «Mirari bat da herri hau bizirik egotea, mende askotan zehar desagerrarazteko estrategia bat egon baita». Nabarmendu zuen Euskal Herriak «sorkuntzatik, herri borondatetik eta antolakuntzatik» egin diela aurre oztopoei, baina etorkizunerantz urrats bat gehiago egiteko beharra azaleratu zuen: «Erresistitzen ikasi dugu, baina herrien egoera naturala ez da erresistentzia, baizik eta askatasuna».

Horretarako aukera ikusten du koalizioko buruzagiak. Estatu eredua krisian da, haren hitzetan: «Herriek auzitan jarri dute. Erraza baita Franco Erorien Haranetik ateratzea, baina oso zaila frankistak estatu aparatuetatik egoztea». Autodeterminazio eskubidearekiko errespetua eskatu zion Espainiako Estatuari, baina pausoak Euskal Herrian bertan eman behar direla erantsi zuen: «Herria askatu behar dugu, eraldatu, eraiki. Fase horretan sartu behar dugu orain. Euskal nazioak merezi duen estatus politiko, ekonomiko, kultural eta instituzionala lortu behar du».

Bidea ere marraztu zuen: «Bloke historiko bat eraiki behar dugu, nazio hau merezi duen estatusera eramateko». Siglez harago joan beharra aipatu zuen: «Herri honetako indar guztiak artikulatu behar dira: herri mugimenduetatik, sindikatuetatik, alderdi politikoetatik, norbanakoetatik, eta lidergo berri batekin».

Instituzioetan eta kalean

Bide hori ez da hutsetik hasi behar, ordea, atzo Pereak azaldu zuenez. «Batzuk izututa daude EH Bildu instituzioetan dagoelako. Badakite alternatiba bakarra garela». Koalizio abertzaleak Nafarroako, Gipuzkoako edota Madrilgo erakundeetan egindako ibilbidea gogoratu zuen, baita udaletakoa ere: «Politika da proiektu eraldatzaile eta aurrerakoiak herritarren mesedetan jartzea. Jendearen bizitzak hobetzeko politikak erdigunean ipintzen ditugu». Halere, independentzia gogoa erakundeetatik kanpo elikatzeaz ere aritu zen, jendetzari begira: «Hemen herri duin bat dago, instituzioetan ordezkatuta, bai, baina kalean aktibo eta borrokalari».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maddalen Iriarte EH Bilduko bozeramailea, atzo, Eusko Legebiltzarrean. ©JAIZKI FONTANEDA / FOKU

«Aukera bat» aurrekontuei

Jon O. Urain

EH Bilduk ez dio osoko zuzenketarik jarri Jaurlaritzaren aurrekontu proiektuari, «elkarrizketarako borondate zintzoa» erakusteko. Eskertuta erantzun du Urkulluk: «Bide berri bat irekitzen da»

Igandean egin ziren kontzejuetako hauteskundeak. Irudian, Añuako herritarrak botoa ematen. ©ARABAKO KONTZEJUEN ELKARTEA

Arabako kontzejuen %24k izango dute emakume bat lehendakari

Edurne Begiristain

Kontzejuetako administrazio batzarretako ordezkariak aukeratu dituzte. Finantzaketa, digitalizazioa, emakumeen parte hartzea eta despopulazioa izango dituzte erronka nagusi

Olatz Garamendi Gobernantza Publiko eta Autogobernu sailburua ©Raul Bogajo / FOKU

Garamendik ez du parte hartuko Autonomia Erkidegoetako Presidenteen Konferentzian

Oihane Puertas Ramirez

Adierazi du Espainiako Gobernua hitzartutako «aldebiko akordioak behin eta berriz ukatzen» ari dela, eta Sanchezen Gobernuari eskatu dio bete dezala Eusko Jaurlaritzarekin «hitzartutakoa». Garamendik nabarmendu du ez dutela onartuko «Eusko Jaurlaritza gutxiestea».

Auzitegi Nazionalak Josu Urrutikoetxea epaitzea ebatzi du

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.