Albistea entzun

Bizikleta gainean jolasean

Demi Vollering. Oraina oraingoz, eta bide beretik segitzen badu, etorkizuna ere bai. Euskal Herriko Itzuliko hiru etapak eta lasterketa irabazi izanak gauza asko eman ditu aditzera.
Demi Vollering Donostiako helmugan garaipena ospatzen, igandean, Euskal Herriko Itzuliko azkeneko etapan.
Demi Vollering Donostiako helmugan garaipena ospatzen, igandean, Euskal Herriko Itzuliko azkeneko etapan. GORKA RUBIO / FOKU Tamaina handiagoan ikusi

Aitor Manterola Garate -

2022ko maiatzak 17

Txirrindulari on bat Herbehereetakoa izatea ez da kontu berria. Harrobi amaigabea daukate emakumezkoetan eta gizonezkoetan. Bizikletari lotuta bizi den herrialdea izateak edukiko du eragina horretan. Herritar bat, bizikleta bat. Haur bat, txirrindulari profesional posible bat.

Haurra zenean, ibiliko zen bizikleta gainean Demi Vollering (Pijnacker, Herbehereak, 1996). Jolasean hasieran. Jostailua, bizikleta. Eta urteen joanean, txirrindulari profesional egin zen. Jostailua joko, zaletasuna ogibide. Horregatik esaten du ziurrenik zer den txirrindularitza: «Joko bat bezalakoa da niretzat».

Jokoa jolas. Horrela ibili da Euskal Herriko hiru lurraldetako errepide gorabeheratsuetan ostiraletik igandera. Primeran jokatu du aurreneko Itzulian, eta jolastu egin da aurkariekin. Hiru etapa, eta hirurak irabazi. Sailkapen nagusia bereganatu du, baita Puntuena ere. Historian sartu da, gainera, eta lekua egin du Euskal Herriko txirrindularitzaren historian: Vollering abizenaren alboan betirako azaldu da Itzuliko lehen garailea izan dela. «Oso pozik nago egindakoarekin. Gai izan naiz hiru etapak eta lasterketa irabazteko», kontatu zuen herenegun Donostian, lanak bukatu eta gero.

Gai izango zela bazekien. Edo horren berri eman zuen, behintzat, Bastidan (Araba) ostiralean, aurreneko etapa bukatu eta gero BERRIAri eman zion elkarrizketan: «Indartsuena naiz lasterketa honetan, eta datozen bi egunetan ere horrela izaten segitzea espero dut».

Konfiantza adierazpena izan zen. Ez harrokeriarena. Pentsatzen zuena garbi esan zuen, eta oso zuzen zebilela erakutsi zuten ondorengo bi lehiaketa egunek. Bigarren denboraldia du SD Worx bere herrialdeko taldean. Aurretik ParkHotel Valkenburg taldean ibili zen bi urtez. Oraingoak fitxatu zuenean, zertara zihoan lasai asko azaldu zuen, umil: «Asko ikas dezaket talde honetan».

Ikusiz ikasten duena izateko, badu eta bazuen irakasle aparta urrutira joan gabe: Anna van der Breggen du zuzendari orain, eta iaz taldekide. Alboan izan du Itzulian: hura autoan, eta bera bizikletan. Miresmena dio gazteak ziklista ohiari: «Oso garrantzitsua da niretzat. Asko ikasten ari naiz harekin. Gustatzen zait besteengan inspiratzea». Bereizgarri bat nabarmendu du: «Badaki lasterketa aurretik txirrindulariak ahalik eta gehien lasaitzen. Oso garrantzitsua da hori». Biak alderatzen hasita zeuden lehendik ere Herbehereetan. Iazko sasoiaren hasieran, telebista saio batean galdetu zion kazetariak Volleringi ea «Anne berria» al zen: «Ondo dago hori», erantzun zion Itzuliko irabazleak.

Ontzat hartzen baititu erronkak. Horrelaxe barneratu zuen SD Worxeko kideak fitxatzera joan zitzaizkionean. Berehala pentsatu omen zuen hau: «Talde gogor batera noa, baina horixe nahi dut. Onenen aurka lehiatzea gustatzen zait, txirrindularitzaren jokoan ondo jokatzea».

Frantziako Tourra helburu

Itzuliaren jokoan, pena bakarra izan da UCIren zerrendako munduko lehen bi sailkatuak ez lehiatu izana: Annemiek van Vleuten (aurrenekoa) eta bera (bigarrena). Frantziako Tourrean izango dute aukera, gauzak ondo direla: «Helburua da niretzat», esan du Itzuliko irabazleak.

Oraingoz, 11 garaipenera gizendu du palmaresa. Eta indarra eman dio: «Konfiantza handia emango dit».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Jokin Altuna, ezker eskuari begira, joan den ostiralean Idiazabalgo (Gipuzkoa) Igarondo pilotalekuan egindako entrenamenduan. ©ANDONI CANELLADA / FOKU

«Oso ondo etorri zait gelditzea: behar nuen»

Julen Etxeberria

Jokin Altuna bihar itzuliko da lehiara, azkenekoz jokatu zuenetik hilabete eta erdira. «Zuhur» jokatu nahi izan du: «Oso argi nuen: ez nuen presarik, ondo osatu nahi nuen, eta, gero, gozatu; ez zuen merezi bueltaka ibiltzea».
Jose Ramon Garai eta Unai Laso, atzo, aurkezpenean. ©MARISOL RAMIREZ / FOKU

Unai Lasok 2027ra arte berritu du kontratua Baikorekin

J. Etxeberria

«Oso pozik» dago aurrelaria, eta eskerrak eman dizkie Pilotarien Elkarteari eta enpresari. Garaik esan du Lasok «jauzia» egin duela
Luixa Uzkudun eta Izadi Arrospide ama-alabak, igandean lortutako garaikurrarekin. ©BERRIA

Estreinako aldiak xarmatuta

Jon Ander De la Hoz

Luixa Uzkudun eta Izadi Arrospide ama-alabak nagusitu dira binakako lehendabiziko sega-sail txapelketan. Inoizko lanik luzeenak egin dituzte, 300 metro karratu ebakita: «Oso polita izan da».
Jose Ramon Garai eta Unai Laso, gaur, aurkezpenean. ©MARISOL RAMIREZ / FOKU

Unai Lasok 2027ra arte berritu du kontratua Baikorekin

Julen Etxeberria

Aurrelaria «oso pozik» dago, eta eskerrak eman dizkie Pilotarien Elkarteari eta enpresari. Jose Ramon Garaik esan du Lasok «jauzia» egin duela.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...