Final bat balitz bezala

Osasunak baliteke egun handia bizitzea gaur: Europarako sailka daiteke, hamasei urte luzeren ondoren. Bere egingo du zazpigarren postua Gironari irabazten badio. Galaz jantzitako Sadarren jokatuko da neurketa (18:30, Dazn). Berdinduta ere lor lezake saria, aurkari zuzenen emaitzak alde izango balitu. Kopako finala gogoan, beste neurketa erabakigarri bat jokatuko dute gaur. Oraingoan, ez dute esku hutsik gelditu nahi.

Kasik mirariz jarraitzen du Osasunak zazpigarren postuan. Getaferen zelaian kale egin zuen, baina Athletic, Girona eta Sevilla ere ez ziren punturik lortzeko gai izan. Getaferi irabazi izan balio, Iruñeko taldea Konferentzia ligan legoke dagoeneko. Gaur Gironaren aurka gailenduta, ez diete besteen emaitzei erreparatu beharko. Berdinduta, berriz, Athleticek, Rayok eta Sevillak ez irabaztea beharko lukete. Aukerarik gabe geldituko lirateke galduz gero: Gironak, gutxienez, aurreratu egingo lituzke. Kataluniarrek ere zazpigarren izateko ilusioa dute.

Hortaz, kale edo bale egiteko partida izango da Osasunarentzat nahiz Gironarentzat. Gisa bereko beste zenbait neurketa jokatu dituzte azkenaldian. Adibidez, aurrez aurre izan ziren iazko Kopako final hamaseirenetan; 1-0 nagusitu ziren kataluniarrak. Aurrez, ordea, nafarrek egin zuten irri, eta nola, gainera: 2016an Lehen Mailara igo ziren Girona kanporatuta, Enrique Martin Monrealen agindupean.

Orain, Jagoba Arrasateren eskutik ari dira arrakasta lortzen, eta gaur ginga jar diezaiokete dagoeneko historikoa den denboraldiari, Europako talde bihurtuta. Jauzi handia izango litzateke kirol esparruan. Eta ekonomikoki ere bultzada emango lieke. Zazpigarrenak eskupeko mardula jasotzen du azpitik gelditzen diren taldeen aldean. Horri, Konferentzia ligan parte hartzeagatik jasotzen den dirua gehitu behar zaio.

Girona kolpeak trukatzeko prest egoten da. Ez alferrik, 57 gol sartu ditu orain arte, eta 53 jaso. Arrasatek prest ditu Vidal eta Brasanac ez beste jokalari guztiak. Moik arazo fisikoak izan ditu azken asteetan, baina osatu da.

Arrasatek «ilusio handiarekin» daudela berretsi zuen. «Zerbait polita dugu jokoan, eta,zaleekin batera, horren bila joan behar dugu. Haiek gure onena ematera behartuko gaituzte, baina onena espero dut nire jokalariengandik».