Noiz sortua: 2020-03-08 00:30:00

Kastaz eta distiraz

Ezkurdiak eta Martijak erakustaldia eman dute finalerdietako ligaxkako lehen partidan, eta 22-16 garaitu dituzte Jaka eta Zabaleta. Azken txanpan tentsioa hobeto kudeatu dute garaileek
Julen Martija pilota jotzen, atzean Jose Javier Zabaleta duela.
Julen Martija pilota jotzen, atzean Jose Javier Zabaleta duela. JAGOBA MANTEROLA / FOKU Tamaina handiagoan ikusi

Jon Eskudero -

2020ko martxoak 8

Sumatzen zuten Iruñeko Labritera atzo gerturatu ziren pilotazaleek egun egokia zela txapelketako partida bat ikusteko, eta ez ziren erratu. Ez horixe. Besteak beste, jarraitzaile dezente geratu ziren pilotalekura sartu ezinik, sarrera guztiak salduta zeudelako, baina sartu zirenek zorte ederra izan zuten. Izan ere, neurketa ikusgarria izan zen finalerdietako ligaxkako lehenengoa. Denetarik izan zuen: gogortasuna, kalitatea, distira, tenplea... Eta, pronostikoak hautsiz, Ezkurdiak eta Martijak irabazi egin zieten Jakari eta Zabaletari: 22-16. Azken horiei txapelketa guztian ez bezalakoak bizitzea tokatu zitzaien; izan ere, ligaxkan hamalau partidetatik hamabi irabazi ondoren, atzo ibili ziren aurrenekoz estu eta larri. Partida ona jokatu zuten, baina bi aurkari bikainekin egin zuten topo. Ezkurdiak erakustaldia eman zuen lehen zatian, eta Martijak atzelari batek egin dezakeen lanik onena egin zuen bigarrenean. Hala, ligaxka sasoi onarekin hasi zuten nafarrek.

Irabazleek bazekiten oso garrantzitsua zela lehen tantoetan aurkarien neurrian egotea, besteak beste, pilotek distira gehien daukatenean zabaltzen baititu tarte handienak Zabaletak. Ordea, bilatu zituen neurriko zapatak Etxarrengo atzelariak. Martijak hasiera ona egin zuen, eta piloteoari eutsi ez ezik, tarteka bizkarra erakutsi zion Zabaletari. Ondorioz, Ezkurdiak atera zion etekinik handiena atzeko koadroetako oreka horri. Beste behin, izar baten pare aritu zen; hark hartu zuen partidaren zama, eta erasoan trebe jokatu zuen etengabe. Erritmo handia ezarri zuen kantxan, eta Jaka defentsan aritzera behartu. Ezker airea nahi bezala baliatzerik ez zuen izan lizartzarrak. Aurrean eginiko lehen tantoa 8-6koa izan zuen.

Ordura arte oreka izan zen nagusi, baina 8-6kotik 13 eta 8ra igaro zen norgehiagoka. Bost tantoren alde garrantzitsua eskuratu zuten gorriek, batez ere kastari esker. Lan erdiak arte pilota bana besterik ez zituzten galduak Jakak eta Zabaletak, baina Ezkurdiaren inspirazioa apartekoa izan zen atzoko norgehiagokan. Gogoangarria izan zen 11-8an egin zuen tantoa. Lehenbizi, zabalean ezinezkoa zirudien pilota bat altxatu zuen, eta gero hark bukatu zuen tantoa. Pilotazaleak zutik jarri zituen lau eta erdiko txapeldunak. Laineza hartuta zegoen, eta Jaka eta Zabaleta, berriz, egoera zail bat kudeatu beharrean. Tentsioak gain hartuta, akaso.

Bazirudien garaileek alde polita zutela partidaren bigarren zatiari aurre egiteko, baina urdinak ez zeuden amore emateko. Pilotak pixkanaka gastatuz joan ziren, eta horrek mesede egin zien Jakari eta Zabaletari. Atzelariak gehiagotan erakutsi zion bizkarra Martijari, eta Jakak ere asmatu egin zuen tantoak bukatzen. Aldea murriztuz joan ziren: 15-10, 15-13 eta 17-16. Tanto soil batera ere hurbildu ziren, eta baina hortxe bukatu zen haien itxaropena. Fisikoki apur bat behera egin zuen Martijak, baina kasta izugarria duela erakutsi, eta azken txanpari berria bezala ekin zion. Berriz ere partida irabazteko aukera eskura jartzean, beldurra sartu zitzaien urdinei, eta ez zuten asmatu egoera kudeatzen. Ezkurdia egon zen horretan ondoen. Aspaldiko mamuetatik urrun, aurpegia eman zuen Arbizukoak, eta azken tantoetan burutsu aritu zen. Taktikoki ongi, eta jokoz ere bai.

Besteak beste, unerik erabakigarrienean jokoan asko sartzea erabaki zuen Ezkurdiak. Boleaz ordura arte baino gehiago lagundu zion Martijari, eta ezkerrez ere ezin hobeto asmatu zuen pilota zabaltzen. Jakak bi bider huts egin zuen pilota ezker hormara biltzerako garaian. Beste martxa bat sartuta, gorriak zuzenean heldu ziren 22ra, eta oso puntu garrantzitsua eskuratu zuten. Teorian, ligaxkako bikote faboritoari irabazita, finala gertuago dute. Jakak eta Zabaletak, bestalde, ezingo dute ia hutsik egin geratzen zaizkien bi partidetan.

Gaur, Bilbon

Bada, finalerdietako ligaxkako bigarren partida gaur jokatuko da, Bilboko Bizkaia pilotalekuan, 17:00etatik aurrera. Azken orduko aldaketa batengatik, Olaizola II.ak ez du Urrutikoetxearekin jokatuko, baizik Arangurenekin. Hortaz, Laso eta Albisu izango dira faboritoak. Azken horiek nabarmen gora egin dute aspaldian. Albisu azken denbora luzeko sasoirik onenean dago, eta Lasok ere badu motiborik konfiantza izateko. Dena den, hobe izango dute ez fidatu, Olaizola II.ak berak ere hobekuntza nabarmena izan baitu azken hilabetean. Ezker airez min handia egin dezake, eta, Arangurenek laguntzen badio, baliteke partidak arriskua izatea.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

Ordiziako positiboekin lotutako 48 kasu zenbatu dituzte dagoeneko

Ordiziako positiboekin lotutako 48 kasu zenbatu dituzte dagoeneko

Arantxa Iraola

Maskara erabiltzea derrigorrezkoa izango da Gipuzkoako herri horretan, eta tabernetako jarduna mugatuko dute

Ordiziako Majori kiroldegia, atzo, itxita. ©JUAN CARLOS RUIZ / FOKU

Ordizian, saguari isatsetik berriro heldu nahian

Jon Ordoñez Garmendia

Kaleak hutsik daude, eta kezkak bete ditu Ordiziako etxeak. Itxialdiaren lainoa agertu da, eta penaz eta amorruz bizi dira ordiziarrak fokuan, uztailekoak ez diruditen egun hauetan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna