Nahasmendua argitzen

Epilepsia duten hamar lagunetik zortzik bizimodu arrunta egin dezake medikazio egokia behar bezala hartuz gero; oro har, epe ertainera hasten da pazientea sendagai horien onurak nabaritzen. Baina beste biek ez dute nerbio sistemari eragiten dion nahasmendu hori kontrolatzea lortzen. Horietako batzuek Gurutzetako Ospitaleko (Barakaldo, Bizkaia) Epilepsia Unitatean aurki dezakete konponbidea. Euskal Herrian nahasmendu hori duten pertsonentzako unitate bakarra da. Eta bertako buru Ainhoa Marinas neurologoak azaldu zuen atzo zein lan egiten duten. Arabako Epilepsia Elkarteak antolatutako 12. jardunaldietan hartu zuen parte. Paziente eta senideei azaldu zien kasu batzuetan burmuinean egindako ebakuntza txiki batekin epilepsiaren sorburuan eragitea lor daitekeela. Baina aukera hori ere ez da guztientzat baliagarria, burmuinaren zati guztiak ez direlako maila berean ezagutzen.

Horrez gainera, nahasmenduari lotutako hainbat ikerketa egiten dira Gurutzetan. Besteak beste, epilepsiak arlo neuropsikologikoan eta psikiatrikoan eragiten dituen kalteak ere neurtzen dituzte. Izan ere, nahasmendu honek depresioa, antsietatea eta portaera aldaketak eragin ditzake, psikiatriari dagokionez; neuropsikologiatik erreparatuta, berriz, memorian, hitz egiteko gaitasunean eta mugikortasunean eragin dezake. Arabako Epilepsia Elkarteko psikologo Carmen Truebaren arabera, epilepsia dutenek arlo horietan guztietan behar dute arreta. «Batzuetan ondorio psikologiko edo psikiatriko horietan lan eginez gero, pazienteek medikazio gutxiago hartzeko aukera egon daiteke».

Era berean, zehaztu du kalte horiek beti ez direla nahasmenduak eragindakoak: medikazioak edo epilepsiak gizartean duen «estigmak» eragindakoak ere izan daitezke. OMEaren arabera, herritarren %1ek du epilepsia. Gizartean «txarto ikusita» dagoen nahasmendua dela kexatu da Trueba.