Albistea entzun

Diala Ayex. Justiziaren Aldeko Abokatuak erakundeko kidea

«Palestinak aske izan nahi du: Israelekiko eta PANekiko aske»

Palestinako Poliziak atxilo hartu zuen Ayex abokatua uztailaren 4an, Nizar Banaten heriotzak eragindako protestetan parte hartzeagatik. Azken protestetan Palestinako Poliziak baliatutako indarkeria salatu du.
DIALA AYEX Tamaina handiagoan ikusi

Maddi Iztueta Olano -

2021eko uztailak 23

Palestinako «preso politikoen» alde egiten du lan Diala Ayex abokatuak (Jerusalem, 1995). Haien kasuak defendatzen ditu auzitegietan, eta beren giza eskubideak errespetatzen dituztela bermatzen du. Uztailaren 4an preso eraman zuen PAN Palestinako Aginte Nazionaleko Poliziak, Nizar Banat aktibistaren heriotzak piztutako protestetan parte hartu eta horietan atxilotutakoak babesteagatik. Bizi izandakoa azaldu dio BERRIAri.

PANeko kideek manifestarien aurka erabilitako indarkeria salatu dute askok. Horrelako jokabideak ikusi dituzuen lehen aldia al da?

Egia esan, iraganean ez dut inoiz halako indarkeriarik ikusi. Orain, Palestinako biztanleok isilik nahi gaituzte. Justiziaren Aldeko Abokatuak erakundeko langileon jarduna gelditu nahi dute. Protestetara bildu ziren kazetariei ere eraso zieten; beren kamerak eta mugikorrak hartu zituzten. Giza eskubideen defendatzaileek, kazetariek eta abokatuek haien ekintzen berri ematea eragotzi nahi dute.

Abokatuak eta giza eskubideen defendatzaileak atxilotu zituztela aipatu duzu. Zu horietako bat izan zinen. Zer gertatu zen?

Bai, aurreko uztailaren 4an atxilotu ninduten, komisaria baten aurrean nengoela. Manifestazioetan atxilotutako presoen giza eskubideak defendatzeko eta haiekin hitz egiteko joan nintzen hara, eta horrexegatik eraman ninduten preso.

Ehun metro inguruko bidea egin genuen atxilotu ninduten tokitik hurrengo komisariara, eta bidean bi aldiz jo ninduten: behin, bularrean, eta beste behin, bizkarrean. Poliziak herritarrok babestu behar omen gaitu, baina ni ez naiz babestua sentitzen. Orain ez naiz gai sentitzen laguntza eske polizia etxera joateko.

Zer eskatzen dute manifestariek?

Manifestarien artean bi iritzi nabarmentzen dira. Alde batekoek indarkeria erabili duten PANeko kideak beren karguetatik kentzeko eskatzen dute, eta horien ordez beste batzuk aukeratzeko. Beste aldekoek diote Palestinako herritarrok askatasuna izan behar dugula helburu: Israelekiko eta Palestinako Aginte Nazionalarekiko askatasuna.

Zer iritzi duzu zuk?

Nire aburuz, goi kargudunak aldatzearekin ez da auzia amaituko. Palestinak aske izan behar du: Israelekiko eta Palestinako Aginte Nazionalarekiko aske. Izan ere, PANeko kideek okupazioaren aurkako borroka oztopatzen dute, eta indarkeria basatia erabiltzen dute gure aurka. Norbaitek Palestinaren askatasunaren alde ekintzaren bat egiten badu, PANeko kideek atxilotu egiten dute, edo Israelgo Poliziari ematen diote hura atxilotzeko abisua.

Israelen aurkako borrokan jarri behar dugu arreta, eta horretarako beharrezkoak dira denbora eta bakea. Orain gobernuan daudenek ez gaituzte ordezkatzen; Palestinaren etorkizunean pentsatzen duen norbait behar dugu, ez Israeli men egiten dion norbait. Sistema errotik aldatu behar da.

Nazioarteak lagun dezakeela uste duzu?

Egin zezaketen zerbait, baina ez dut uste ezer aldatzen lagunduko dutenik. AEBetan Israel babesten dute, eta Europako hainbat herrialdek PAN finantzatzen dute. Palestinako herritarrok babesik gabe sentitzen gara.

Datozen asteetan protestak egongo dira?

Borrokan jarraitu behar dugu; bestela, PANeko kideek manifestari eta aktibista gehiago atxilotuko dituzte. Nizar bere iritzi politikoagatik hil zuten, eta, ez badugu horren inguruan zerbait egiten, isilik jarraitzen badugu, ehunka gehiago hilko dituzte arrazoi beragatik, edo guztiok preso politikoak izango gara.

Aktibismoan jarraituko duzu?

Atxilotuta eraman nindutenean, oso beldurtuta nengoen. Lehen bi egunetan ez nuen ia inorekin hitz egin; ez nuen berriz atxilotua izan nahi. Baina pixka bat lasaitu nintzenean auzitegira joan nintzen, abokatu gisa nirekin batera atxilotu zituztenak defendatzeko. Oso argi daukat: borrokan jarraituko dut.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©BERRIA

«Moiseren hilketak herritar eta begirale asko harritu ditu»

Iosu Alberdi

Haitiko presidentearen heriotzak «ziurtasunik gabeko» egoeran utzi du herrialdea. Parraren ustez, «ez da aldaketa handirik» espero.

Milaka manifestari sexu eta genero askatasunaren aldeko Budapest Harro martxan, atzo, Hungariako hiriburuko erdigunean. ©ZOLTAN BALOGH / EFE

Milaka hungariarrek harrotasunez salatu dute Orbanen lege homofoboa

Gorka Berasategi Otamendi

LGTBI kolektiboaren kontrako «kanpaina» gaitzetsi dute. Gobernua Hungariako gizartea «zatitzen» ari da, manifestarien iritziz. Lehen ministroaren jokabidea datorren urteko bozekin lotu dute

<b>Beilatokia.</b> Soldaduak Jovenel Moiseren hilkutxaren aurrean, atzo, Cap-Haitienen. ©J.M.H.A. / EFE

Hilketa argitzeko protesta artean lurperatu dute Haitiko presidentea

Gorka Berasategi Otamendi

Moiseren emazteak «traizio» egin ziotela salatu du. «Justizia» galdegin du, baina «mendekua» baztertzeko eskatu die herritarrei. Istiluak izan dira Cap-Haitien hirian

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.