Noiz sortua: 2020-02-02 00:30:00

Haur eskolak babesteko prest

Ehunka lagun bildu dira Iruñean euskarazko haur eskolen eskaintza murriztu ez dadila eskatzera
Ehunka lagunek lepo bete dute Iruñeko Udaletxe plaza, euskarazko haur eskolak babesteko elkarretaratzean.
Ehunka lagunek lepo bete dute Iruñeko Udaletxe plaza, euskarazko haur eskolak babesteko elkarretaratzean. IÑIGO URIZ / FOKU Tamaina handiagoan ikusi

Iker Tubia -

2020ko otsailak 2
Astelehenean, Iruñeko haur eskola euskaldunen eskaria murriztuko zuela iragarri zuen Enrique Maia Iruñeko alkateak. Atzo, ehunka lagunek bat egin zuten haur eskola euskaldunen aldeko elkarretaratzearekin. Hiriburuko Udaletxe plaza lepo bete zen «euskaldunen aurkako eraso larria» salatzeko. Izan ere, Navarra Sumak euskarazko eskaintza erdira baino gutxiagora murriztuko du. Are, UPNren aurreko legealdian baino eskaintza murritzagoa eginen du udalak aurrerantzean. Horregatik, oposizioko alderdiei dei egin zieten Navarra Sumaren «erasoak» gelditu ditzaten.

Elkarretaratzera Iruñeko Haur Eskola Euskaldunen Aldeko plataformak deitu zuen, eta bi pankarta paratu zituzten udaletxeari begira: Iruñean haur eskolak euskaraz! eta Iruñeko haur eskoletan lan eta ikasi euskaraz leloekin; horri euskarazko haur eskoletako hezitzaileek heldu zioten. Euskalgintzako kideak ere han izan ziren, baita Maider Beloki EH Bilduko zinegotzia ere. Joan den legegintzaldian bera izan zen Hezkuntza zinegotzia, eta hari egokitu zitzaion haur eskolen afera kudeatzea.

Elkarretaratzearen bukaeran Lourdes Garmendia Donibane haur eskolako hezitzaileak eta Asier Biurrun Iruñeko Haur Eskola Euskaldunen Aldeko plataformako kideak hartu zuten hitza. Oposizioari mintzatu zitzaizkien: «Navarra Sumaren erasoak gelditu ditzatela eskatzen diegu Geroa Bai, EH Bildu eta PSN alderdiei». Herritarrei ere eskari zuzena, «denen bultzada» beharko delakoan: «Lehen bezala, orain ere gure goxotasun, irudimen eta kemen guztia beharko dugu Iruñean euskaraz bizitzeko» .

Deitzaileen arabera, Maiak hartutakoa ez da erabaki bakana izan: «Euskarazko eskaintza murrizteko neurri hau bat dator hilabete hauetan Navarra Sumak euskarafobiaren itzalean hartutako beste neurri batzuekin». Izan ere, haien aburuz, haur eskoletako euskarazko eskaintzaren murrizketa loturik dago beste erabaki politiko batzuekin: euskararen ordenantza bertan behera uztearekin, haurren aisialdian euskarazko eskaintza murriztearekin, euskarazko hedabideak publizitaterik gabe uztearekin edota Pirritx, Porrotx eta Marimototsen ikuskizunak zentsuratzearekin.

Egoera horri aurre egiteko, euskaraz bizitzeko asmoa dutela aldarrikatu zuten: «Gure eskubidea delako, bai, baina eleaniztasunera salto egiteko elebitasunak eskaintzen dituen abantailengatik ere bai». Bozeramaileen arabera, bi hizkuntza ongi menperatuta, errazagoa da beste bat ere ikastea. «Iruñean, bi hizkuntza modu egokian eta orokortuan ikasteko modu bakarra euskarazko murgiltze eredua eskaintzea da», esan zuten.

Administrazioak bertako hizkuntza babestu eta zabaldu beharko lukeela ere esan zuten, baina hori ez dela horrela: «Euskaldunok Iruñean ikusezin, hutsaren hurrengo nahi gaitu UPNk». Hala, haren helburua iruindarrek euskaraz bizitzeko duten eskubideari muga jartzea dela salatu zuten. Seme-alabak euskarazko ereduan hezi nahi dituztenek aukera hori bermaturik izatea ere galdegin zioten udalari.

Manifestazioan giro ona izan zen: Ene Kantak taldekoen dantzarekin hasi zen protesta, eta euskararen aldeko kantak abestu zituzten gero han zirenek Iruñean Kantuz taldearekin batera. «Haur eskola euskaraz» eta «Maia, entzun, Iruñea euskaldun» oihuak ere etengabe aditu zitezkeen plazaren inguruetan.

Eskaintza murritza

Gaur egun Iruñean hamasei haur eskola publiko daude horietarik bost Nafarroako Gobernuarenak dira, eta lautan baizik ez da euskarazko eskaintzarik. Navarra Sumak erabaki du hemendik aurrera bi haur eskolatan baizik ez duela eskainiko, eta, horietako batean, ez da soilik euskarazko eredua egonen. Beraz, Printzearen Harresi eta Donibane haur eskoletako euskarazko eskaintza kenduko du udalak, eta Goiz Eder haur eskolaren eskaintzaren erdiak euskarazkoa izanen dira, baina beste erdiak gaztelerazkoa ingelesezko jarduerekin. Haur eskola euskaldun bakarra Txantrea auzoan egonen da: Izartegi.

Albiste gehiago

Martxoaren 31n eguneratua, 14:00etan. ©BERRIA

Koronabirusaren azken datuak

Berria

Euskal Herrian 8.647 gaixok eman dute positibo koronabirusaren proba eginda, administrazioen arabera. 441 hil dira. COVID-19 gaitza izandako 1.775 pertsonari eman diete alta. Grafikoak, albiste barruan.

Pankarta bat, Biboko Zapikaleetan. ©Marisol Ramirez / Foku

500 hildakoen langa gainditu du izurriak Euskal Herriak

Berria

Dagoeneko 501 pertsona hil ditu gaitzak. Hego Euskal Herrian 9.335 kasu diagnostikatu dituzte. Sindikatuek gutun bat bidali diote Denis Itxaso Madrilek EAEn duen ordezkariari, besteak beste zentralizazioa bertan behera uzteko eskatzeko, eta Maddalen Iriartek mahai bat eratu nahi du erabakiak hartzeko

1983ko abuztuan, Busturian, uholdeetan. ©BERRIA

Zer egin krisi bati aurre egiteko?

Enekoitz Esnaola

Jaurlaritzako eta Nafarroako lehendakariek, euskal gatazkako indarkeriaz gain, zenbait garai sozial gogor ere bizi izan dituzte 40 urteotan: uholdeak, sute eta istripu larriak, krisi ekonomikoak... Carlos Garaikoetxeak, Jose Antonio Ardanzak, Patxi Lopezek eta Uxue Barkosek lehendakari gisara bizi izan zituzten krisietan izandako esperientziak kontatu dizkiote BERRIAri. Garrantzia eman diote gertutasuna eta sentsibilitatea izateari, baita neurriak hartzeari ere.

Aceros Olarra lantegia, Loiun, atzo. ©Marisol Ramirez / Foku

Tubos Reunidosek berriro zabalduko du

Iker Aranburu

Jaurlaritzak uste du industria osoak eutsi ahal diola jarduera txiki bati. Mondragonek dio «atzeraezinezko konpromisoak» bete ahal izango dituela, eta CAFen 37 boluntario ari dira bagoi batzuk entregatzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Informatzeak zenbat balio duen.

Izan zaitez BERRIAlaguna