Bakhmuten aurrera egiten ari direla esan du Ukrainak

Orain arteko laguntza militar handiena emango dio Alemaniak Kievi. Luhanski irismen luzeko misilekin eraso diotela salatu du Errusiak

Volodimir Zelenski presidentea eta Giorgia Meloni lehen ministroa. A. C. / EFE.
arantxa elizegi egilegor
2023ko maiatzaren 14a
00:00
Entzun
Ukrainak ez du ofizialki iragarri Bakhmuteko kontraerasoa hasi duenik, baina Wagner talde paramilitarrak herenegun baieztatu zuen militar ukrainarrek hasia zutela erasoaldia. Atzo, berriz, Ukrainako armadaren lurreko indarreko komandante Oleksandr Sirskik berak berretsi zuen informazioa, esanez ukrainarrek lortu zutela Bakhmuteko frontean aurrera egitea eta kilometro koadro baten kontrola berreskuratzea. Errusiako iturriek ere aitortu zuten ezen ostiralean, hiriaren iparraldeko zenbait eremutan, atzera egin behar izan zutela, baina ukatu egin zuten «erretiratze bat» izan zela.

Aldiz, bere azken buletinean, Errusiako Defentsa Ministerioak jakinarazi du Bakhmut ipar-ekialdeko hainbat guneren kontrola bereganatu dutela azken orduetan, aireko armadaren laguntzaz. Hiria bereganatzeko ahaleginetan ari dira bi aldeak azken asteetan, auzoz auzo, kalez kale, eta azken egunetan, baita metroz metro ere. Sergei Xoigu Errusiako Defentsa ministroak esana du Bakhmut hartzeak aukera emango liekeela Ukraina ekialdean erasoaldia zabaltzeko. Aldiz, NATO Ipar Atlantikoko Itunaren Erakundeko idazkari nagusiak uste du Bakhmuten gertatzen dena ez dela «mugarri» izango. Era batera edo bestera, balio sinbolikoa du hiriak, eta, hainbeste aste luzatu diren borroken ostean, garaipen handia litzateke bi aldeetako edozeinentzat hura erabat kontrolpean hartu ahal izatea.

Baina Bakhmut ez da borrokagune bakarra. Errusiak atzo salatu zuen Ukrainak irismen luzeko misilekin eraso ziola Luhanski, zehazki «Erresuma Batuak emandako misilekin». Betiere Moskuk zabaldutako informazioaren arabera, «zibilen aurka» egiteko baliatu zituen Kievek Storm Shadow motako jaurtigaiak, eta erasoan zauritutakoen artean gutxienez sei adingabe daude.

Zelenski Alemanian

Errusiaren erasoaldia hasi zenetik lehen aldiz, Alemanian izango da gaur Ukrainako presidente Volodimir Zelenski. Karlomagno saria jasotzera joango da hara. Italiatik egingo du bidaia estatuburuak, han izan baitzen atzo, Giorgia Meloni eskuin muturreko lehen ministroarekin eta Vatikanoko buruarekin biltzeko. Italiako Gobernuak iragarri du Kiev babesten jarraituko duela militarki eta ekonomikoki.

Hain zuzen ere, Alemaniak orain arteko laguntza militarrik handiena iragarri eta hurrengo egunean iritsiko da Zelenski herrialdera. 2.700 milioi euroko balioa duen laguntza da Berlinek iragarri duena.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.