Laukoaren gizarte politikei eutsiko diete Nafarroan

Gizarteratze neurrietan «sakondu» nahi duela adierazi du Maeztu kontseilariak parlamentuan
Mari Carmen Maeztu, kargu hartze ekitaldian.
Mari Carmen Maeztu, kargu hartze ekitaldian. JAGOBA MANTEROLA / FOKU Tamaina handiagoan ikusi

Ion Orzaiz -

2019ko irailak 19

Nafarroako Gobernuak gizarte eskubideen alorrean bultzatutako zenbait neurrirekin kritiko azaldu zen PSN iragan legealdian; besteak beste, errenta bermatuarekin edota mendeko pertsonei zuzendutako prestazioekin. Gobernura iritsita, ordea, ez dirudi Eskubide Sozialetako kontseilari Mari Carmen Maeztuk —PSNk berak izendatu zuen kargurako— norabidea aldatzeko asmoa duenik. Aitzitik, azken lau urteotan urratutako bidean «sakontzeko» prest agertu zuen atzo, parlamentuan eginiko agerraldian.

Maeztuk «egokitzat» jo zuen Miguel Laparra kontseilari ohiak eginiko lana, eta iragarri zuen segida emanen diela joan den legealdian martxan jarritako zenbait proiekturi. Kontseilariak, gainera, «elkarrizketa eta elkarlana» eskaini zizkien talde parlamentario guztiei, «zerbitzu sozialetako politikak hobetze aldera». Lehentasun gisa aipatu zuen, besteak beste, «kalitatezko enplegua bultzatzea» eta «gizarteratze politikak indartzea», batez ere bazterketa egoeran diren pertsonen eta familien kasuan.

Enpleguaren alorrean, Maeztuk esan du «funtsezkoa» dela 2020-2024 aldirako enplegu plana martxan jartzea, Maria Txibite lehendakariak aurreko astean iragarri zuen bezala. Gizarte zerbitzuei dagokienez, departamentuak lehen arreta eta oinarrizko zerbitzu sozialak indartzeko helburua du: alde batetik, «eredu komunitario eta hurbilago bat» sustatuko dute, «pertsonen beharrak lehen lerrora ekarrita»; bestetik, elkarlana bultzatuko dute gobernuko beste zenbait departamenturekin; besteak beste, Hezkuntzarekin, Osasunbidearekin, Enpleguarekin eta Etxebizitzarekin.

Maeztuk prebentzio lanaren garrantzia ere nabarmendu zuen atzoko batzordean: «Orain arte, gure lanaren ardatz nagusia izan da bazterketak eragindako kalteak konpontzea, baina arazoaren erroetara jo behar dugu. Kalteak arintzea ongi dago, baina eraginkorragoa da zergatiak garaiz detektatu eta prebenitzea».

Elbarritasunak, mendekotasun egoerak edota buruko gaitzak dituzten pertsonen eta bazterketa egoeran direnen autonomia handitzeko neurri sorta bat ere iragarri zuen kontseilariak. Esaterako, desgaitasun klaseren bat duten pertsonen eskubideak bermatzeko foru legea prestatzen hasiko da gobernua. Gizarte Zerbitzuetako Plan Estrategikoa ere buruan du.

Legeak eta inbertsioak

Martxan jarriko dituzten neurri zehatzen artean, bi foru lege berri azpimarratu zituen Eskubide Sozialetako kontseilariak: batetik, haur eta nerabeen arretarako lege integrala landuko dute; bestetik, pobrezia energetikoari aurre egiteko foru legea. «Gure lehentasunetako bat da Nafarroako pertsona guztiek, eta, bereziki, familiek eta gazteek, bizi proiektua garatzeko aukera izatea». Horiek aurrera eraman ahal izateko, finantzaketa ere handituko du Nafarroako Gobernuak.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Jendea terrazetan Bilbon, astelehenean. ©Aritz Loiola/FOKU

651 kasu atzeman dituzte Hego Euskal Herrian

Berria

Bizkaian kasu gehien atzeman diren eguna izan da: 402. Osasun Saila eta Bizkaiko Foru Aldundia arratsaldean bilduko dira egoera aztertzeko.

 ©JON URBE / FOKU

«02:00etan, festak ezin du segitu eremu pribatuetan»

Aitor Biain

Herritarren parte hartze handiagoa eskatu dute ostalariek, ardura guztia beren bizkar izan ez dadin. Ataka estuan direla ohartarazi dute, eta babes ekonomikoa galdegin diote administrazioari, helegitea onartu edo ez.

Donibane Lohizuneko plaza, konfinamendu denboran ©Bob Edme

Donibane Lohizuneko ostatu bat hetsi dute

Ekaitz Etxamendi

Pirinio Atlantikoetako departamenduko prefeturak erabaki du Donibane Lohizuneko (Lapurdi) Le Miam ostatuaren hestea bost egunez, zigor gisa. Neurria beterik, gaur ireki dute berriro.

Osasun langileak PCR probak egitn Donostian, iragan astean. ©Gorka Rubio/FOKU

Getxoko Bikain tabernan eta Gasteizko Sagartoki eta Oh Malbec jatetxeetan izan zirenei proba egiteko eskatu die Jaurlaritzak

Berria

Toki horietan izan zirenek beren osasun etxera edota osasun aholkularitzara deitu beharko dute ordua hartzeko.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna