Xanti Iparragirre
Bertso eskolen ernamuina
Xanti Iparragirre zendu da, lehen bertso eskolaren sortzaileetako bat. Euskaltzalea eta abertzalea zen, eta euskal iheslaria ere izan zen 2003ra arte. 87 urterekin hil da, hainbat egunez ospitalean egon ostean.
Xanti Iparragirre Perurena euskaltzalea (Errenteria, Gipuzkoa, 1934 - Eskoriatza, Gipuzkoa, 2022) hil zen igande goizean, 87 urte zituela. Azken egunak ospitalean egin ditu, eta, azkenean, bere baserrian hil da. Euskaltzalea eta abertzalea zen Iparragirre, euskal iheslaria, baita bertso eskolen sortzailea ere. Azken agurra gaur egingo diote, 19:00etan, Eskoriatzako San Pedro elizan.
Errenteriako (Gipuzkoa) Añarbe auzoan jaio zen; hamar anai-arrebetatik zazpigarrena zen. Eskoriatzara ezkondu zen 1959an, eta bost seme-alaba izan zituen. Bertan sortu zuen Euskal Herriko lehenengo bertso eskola, Patxi Goikolea eta Juanito Akixorekin batera.
1981ean herritik alde egin zuen Ipar Euskal Herrira, eta sasian ibili zen 2003ra arte. Iparraldean bertso irakasle izan zen hainbat urtez. Marixol Iparragirre euskal presoaren aita ere bazen, eta hura espetxetik Eskoriatzara eraman dute aita agurtzeko.
Iparragirreren heriotzak erreakzio erreskada ekarri du. Bertsozale Elkarteak, adibidez, «bertsolaritzaren alde egindako guztia» eskertu dio. Arnaldo Otegi EH Bilduko idazkari nagusiarentzat, berriz, «herritarra eta herrigilea, euskalduna eta abertzalea» izan da Iparragirre. Hala nabarmendu du: «Ohore bat izan da bidearen zati handi bat zurekin partekatzea».
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
