Glamour popularra

Islandian jaioa, herrialde horretan eta Washington DC-n hazi da Laufey (Laufey Lin Jonsdottir, 1999). Bere ama biolin jotzailea da, eta bere aitona-amonak Pekingo Kontserbatorioko irakasleak izan dira. Musika klasikoa ikasi du, bereziki pianoa eta biolontxeloa, eta, 15 urte zituela, Islandiako Orkestra Sinfonikoan hasi zen jotzen. Heziketa klasiko hori, baina, irauli egin zitzaion aitaren disko bildumaren bidez jazza ezagutu zuenean, tartean, Billie Holiday eta Ella Fitzgerald —azken horrekin erabat maiteminduta omen dago—. 2021ean, Tipicalof izenburukoa EPa argitaratu zuen, eta zerrendetako lehen postuetara iritsi zen Islandian. Egun, 23 urte ditu, Kalifornian bizi da, eta jazz jaialdi handienetan parte hartzen du. Horretaz gainera, BBCn saio bat aurkezten du.

Aurrekari horiek aintzat hartuta, argi dago musikariaren lehen lan luze hau, Everything I Know About Love, ez dela edonolako huskeria. Musika popularraren eta klasikoaren arteko uztartze ezti eta barnekoa da, zeina jazz bokalaren eta kamerako poparen artean kokatzen den, bestelako estiloei bizkarrik eman gabe, hala nola bossa nova eta AEBetako kantutegi klasikoa. Horiek horrela, diskoari vintage kutsua dario, baina, aldi berean, orainean sakon errotuta dago. Diskoaren izenburua ematen dion kantua da horren adierazle, non ekoizpen garaikidea soka konponketekin kiribiltzen den, erritmoz eta lirikaz osatutako kantua sortzeko.

Laufeyk, halaber, estilo batetik bestera salto egiteko gaitasun aparta dauka. Hala, bat-batean, Sergio Mendes musikari brasildarraren Brasil `65 taldean jo zuen Wanda musikariaren azalean sartu, eta bossa nova giroetan bustitako Falling Behind epel eta eguzkitsua eskaintzen digu, zeina grabazioa zabaltzen duen Fragile doinuarekin pareka daitekeen, horrek ere bossa irrikak haizatzen baititu. Islandiarrak, gainera, bi kantu horietan, jazz zertzelada sotilak eransteko ahalmena erakusten du, batez ere bere ahots ahaltsuari eta abesteko abileziari esker. Hala, jazzez eta bossaz girotutako hondartza eguzkitsu batean dagoela pentsa lezake entzuleak.

Jazz zaharraren eragina nabarmena da Dance With You Tonight jostalarian, baina Laufey jazzean ez ezik, orkestra handien konpainian ere bikain moldatzen da, Dear Soulmate eta What Love Will Do to You doinuak, kasu. Balada itxurako abesti malenkoniatsuak dirudite, Hollywoodeko urrezko garaiko filmetan txertatzeko modukoak.

Ezer gutxi nekien musikari fin honetaz, baina han eta hemen aipatuta ikusi ondoren, bere musikan murgiltzea erabaki nuen, eta zalantzarik gabe, Everything I Know About Love disko perfektua da garai ilun, hotz eta euritsu hauetarako. Tapaki pean gustura entzungo duzue, aldean kafesnea edo ardo kopa duzuela.