Albistea entzun

Gaizka Aranguren. ETBko 'Itxi liburuak' saioko aurkezlea

«Iraganeko erreferente komunetan azpimarra egin dezakegu saioan»

Bi aste dira Aranguren 'Itxi liburuak' historiari buruzko programa aurkezten hasi zenetik. Nabarmendu du atal bakoitzaren amaieran «ekarpen baloratibo» bat egiten saiatzen ari dela, epilogo gisa.
IÑIGO URIZ / FOKU Tamaina handiagoan ikusi

Urtzi Urkizu -

2020ko urtarrilak 26

Gaizka Aranguren (Iruñea, 1967) 20 urte zituela hasi zen Euskadi Irratian. Geroztik, komunikazio alorrean egin du lan. EITBn boladaka aritu zen hainbat urtez. Labrit Multimedia ekoiztetxea sortu zuen Iruñean, eta haren zuzendaria da. Orio ekoiztetxearen deia jaso zuen saio baten hautaproba baterako. «Euskal Herriko historiari buruzkoa zela jakin nuenean, berehala joan nintzen». Arangurenentzat, garrantzitsua zen saioa «Euskal Herri guztirako» izatea, eta horri baiezkoarekin erantzun zioten.

Aitzol Barandiaran Itxi liburuak saioko zuzendariaren arabera, historiarekiko duen pasioa kutsatzen duen pertsona zara.

Lore bat da hori. Obsesio bat izan dut beti: Euskal Herriko imajinario kolektiboa indartzea derrigorrezkoa zaigula, herri izateari eutsi nahi baldin badiogu. Imajinario horren barne dauden osagaien artean, iragan amankomunarenak dira batzuk: erreferentzia historiko partekatuak, alegia. Erreferente horiek gizarteratuz, gure imajinario propioa lantzen dugu.

Itxi liburuak saioaren formatuak ematen al die aukera ikus-entzuleei historiarekin gozatzeko?

Aukera bat ematen du behintzat. Eta batez ere aukera ematen digu iraganeko erreferente komunetan azpimarrak egiteko. Adibidez, Nafarroaren konkistaz ari garenean, esateko Nafarroako erresuma izan zela euskaldun guztion egitura politiko juridiko bakarra. Atal bakoitzaren amaieran, ondorio batzuk plazaratzen ari naiz epilogo gisa. Ekarpen baloratibo bat izan daiteke hori.

Horrelako saio batean, gidoi onak aldez aurretik lantzea funtsezkoa izango da, ezta?

Bai. Daukagun arazoa zera da, lan moldeetan dauden inertzien ajeak. Horrelako lan baterako, hilabete batzuk lehenago hainbat dokumentazio lan egiteko aukera egon izan balitz, gidoiak zehazterakoan astez aste, errazagoa litzateke, Baina ia-ia astetik astera hutsetik ari gara hasten, eta zailagoa da gauzak borobiltzea.

Lehen atalak %3ko ikusle kuota lortu zuen; bigarrenak, berriz, %2,2koa. Datu onekin jarraituz gero, hasieran finkatutako sei atalak baino gehiago egiteko aukera izango duzue?

Bai, uste dut baietz. Aukera horiek egon daitezke. Ea aukera daukagun gidoiak gehiago lantzeko.

Edonola ere, El conquistador del Caribe saioak baino promozio gutxiago izango du zuen saioak asteotan. Zer diozu horretaz?

Badirudi gehien jaten duen semearen goseari egiten zaiola jaramon handien.

Gonbidatuei dagokienez, sare sozialetan egon da kritikaren bat ETB1en beti pertsona ezagun berberak agertzen direla.

Arrazoia dute hori esaten dutenek. Badirudi jendeak ezagutzen duen jendea erabiltzen dela ikusleak erakartzeko. Baina gure saioaren erronka, etorkizunari begira, izango da demostratzea menpekotasun hori ez dela ezinbestekoa. Gure iragan historiko partekatua amaiezina ez, baina hortik gertu egongo da.

Ikasleekin zer moduz?

Gauza asko aurreikusita egoten dira, eta haiekin hitzartuta. Lau grabazio egiten dugu, eta gero eta gehiago jolasten da gonbidatu irakaslearen eta ikasleen arteko harremanean. Zukua atera nahi diogu horri. Ikusle gazteak erakartzeko modu bat ere bada.

Saioko atalak hezkuntzarako material gisa erabilgarriak izan daitezke?

Ez naiz pertsonarik egokiena hori esateko, baina beharbada bai, laburpen batzuk izan daitezke erabilgarri, batez ere Euskal Herriko erreferentzien inguruko materiala falta denean. Zorionez, Lur eta Amets bezalako filmak egiten ari dira.

EITB ondo ezagutzen duzu. Zer diozu haren izateaz?

Beti iruditu izan zait EITBk Euskal Herri guztirako plataforma ezinhobea eskaintzen zuela, ikuspegi merkantilista batetik besterik balitz ere. Baina falta zaio anbizio hori. Anbizio hori gauzatu ahal izateko urratsak eman ez direlakoan nago, baina horretan jardun dutenek arrazoiak izango dituzte.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Bel Pozueta, dokumentalean ©Marmoka Films

TV3ek Amets Arzallusen 'Altsasu (gau hura)' dokumentala emango du bihar

Urtzi Urkizu

Arzallusek Marc Parramonekin batera egindako lana Miarritzeko Fipadoc jaialdian ere emango dute, ostegunean. TV3ek, bihar bertan, Altsasuko auzian zigortutako bi gazte protagonista dituen beste dokumental bat estreinatuko du.

 ©Nagore Legarreta

«Sagardoaren prezioa igotzea erabaki behar izan du sektoreak»

Miren Garate - Gipuzkoako Hitza

Mitxelenak esan du sagardotegi garai "berezia" datorrela aurten; izan ere, lehen asteetan behintzat, ezingo da zutik kontsumitu. Mahaira ekarriko dute sagardoa, pitxerretan edo botila gardenetan, iaz bezala.

1 ©GORKA RUBIO / ARGAZKI PRESS

«Arrano Etxearen historia amaitu egin da»

Enekoitz Telleria Sarriegi

«Bizi proiektu bat» animalien zaintzari emana. Horixe da Albisu eta Garcia senar-emazteek Igeldoko euren etxean sortu eta jorratu dutena: teilatupea eta babesa. Aitortza nahikorik gabeko boluntario lana.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.