Gobernuak laguntza bikoiztu dio Navarra TVri, eta %20 gutxitu besteei

Eskualdeetako telebistek «neurri ez-baztertzaileak» hartzeko eskatu diote Nafarroako Gobernuari
Xaloa telebistaren estudioak, Berriozarren, artxiboko irudi batean.
Xaloa telebistaren estudioak, Berriozarren, artxiboko irudi batean. IÑIGO URIZ / FOKU Tamaina handiagoan ikusi

Jakes Goikoetxea -

2020ko azaroak 28

Nafarroako 2021eko aurrekontuen aurreproiektuaren arabera, Navarra TV telebistak 1.300.000 euroko laguntza jasoko du, aurten jaso dituen 660.000 euroen bikoitza. Gainerako telebista guztiek, berriz, 350.000 euro jasoko dituzte, iaz baino %20 gutxiago (438.471 euro izan ziren). Bost telebista sartzen dira bigarren diru sail horretan: Xaloa, Hamaika, Iruindarra, Zona Media eta 30TV. Horietatik bi, Xaloa eta Hamaika, euskaraz. Diru sail hori Navarra TVk jasoko duenaren laurdena da.

Ez da aurtengo aurrekontuekiko alde nabarmen bakarra: Navarra TVk ez du lehiaketara aurkeztu beharrik izango, Nafarroako Gobernuak hitzarmena sinatuko baitu harekin, eta hitzarmenaren bidez emango baitizkio 1.300.000 euroak.

Nafarroako Gobernua osatzen duten alderdiek hitzartu dute 2021eko aurrekontuen aurreproiektua, hau da, PSNk, Geroa Baik eta Ahal Duguk. Gobernuak akordioa lortu zuen EH Bildurekin, aurrekontuak onartu ahal izateko. EH Bildu abstenitu egingo da bozketan.

Xaloa, Hamaika (Nafar Ikusentzunezkoak enpresa), Iruindarra (Abian Media) eta Zona Media TV telebistak haserre daude aurrekontuen aurreproiektuan jasotako diru laguntzen banaketarekin.

Haserre daude, Navarra TVri 1.300.000 euroko laguntza hitzarmen zuzen baten bidez emango zaiolako: «Ez dugu ulertzen zergatik Navarra TVk ez duen lehiatu behar beste operadoreekin batera, lehiaketa batean».

Haserre

Haserre daude, haien artean banatu beharreko diru kopurua gutxitu egin delako, 88.471 euro gutxiago, %20 aurtengo aurrekontuekin alderatuta. 2021eko aurrekontuen aurreproiektuaren arabera, 350.000 euro banatu beharko dituzte bost telebistaren artean.

Aurtengo aurrekontuetan, Navarra TVk 660.000 euro jaso zituen; Xaloak, 290.000 euro; Hamaikak eta Iruindarrak, 50.000 euro bakoitzak; Zona Mediak, 24.630 euro, eta 30TVk, 23.841 euro.

Nafarroako Gobernuari proposatu diote balora dezala telebista bakoitzarekin hitzarmen propio bat egitea, «telebista bakoitzaren proiektu indibidualari egonkortasuna emateko, batez ere lan arloan eta programen produkzioan». Programetan oinarritutako laguntzatik, telebistetan, proiektuetan oinarritutako laguntzetara pasatzea izango litzateke. Zeren, bestela, programetan oinarritutako laguntzekin, oso zaila da lantaldeak eta programazioak egonkortzea eta osatzea.

Banaketa eta banatzeko modua «baztertzaileak» direla iruditzen zaie, eta, egoera horren aurrean, neurri ez-baztertzaileak hartzeko eskatu diote, «premiaz eta luze gabe», eta «Nafarroako telebista proiektuen etorkizuna bermatzeko».

Aurrekontuak hitzartu eta babestu dituzten alderdien zuzenketa partzialen bitartez alda daiteke banaketa. Atzo arteko epea zuten zuzenketa partzialak aurkezteko.

«Diskriminazio negatiboa»

Nafarroako Gobernuaren irizpideek, baldintzek eta kopuruek agerian uzten dute ez dagoela euskarazko telebisten aldeko diskriminazio positiborik.

Are gehiago, Hamaika telebistak salatu du «diskriminazio negatiboa» gertatzen dela, laguntzak jasotzeko orduan baldintzak ez direlako berdinak kate euskaldunentzat eta erdaldunentzat. Euskarazko telebista kateek gaztelaniazkoekin lehiatu behar dute, audientziak irizpide garrantzitsu gisa hartuta, «baina puntuak zenbatzeko orduan audientzia euskalduna edo erdalduna den bereiztu gabe».

Horrez gain, laguntzak banatzeko audientziak aintzat hartzean ez dute bereiztu izan telebistek herrialde osoan emititzen duten —Navarra TV- edo eskualde jakin batean: Iruñerrian Hamaikak eta Iruindarrak; Tafallan Zona Mediak eta 30TVk, eta Baztanen, Bertizaranan, Bortzirietan, Iruñerrian eta Malerrekan Xaloak. Eskualdeetako telebistek herrialde osokoarekin lehiatu dute.

«Honela, Nafarroako Gobernuak planteatutako baldintzetan, ez dago Nafarroan lizentzia bidez eskuratutako telebista zerbitzu publiko bat eskaintzerik», uste du Hamaika telebistak.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Arduraz komunika dezagun

Antxeta irratiak ‘Arduraz komunika dezagun’ dokumentala egin du

Urtzi Urkizu

Hedabideen hizkuntzaren erabilera aztertu dute Euskal Herrian herri ekimenez sortutako hedabide batzuetako zenbait emakumezko kazetarik, berdintasunaren ikuspegitik. Dokumentala ikusgai, albistearen barruan.

 ©JAIZKI FONTANEDA / FOKU

«Neure buruarekin hobeto sentitzen naiz gitarra jotzen dudanean»

Jone Arruabarrena

Gasteizko Oihaneder Euskararen Etxeak antolatutako 'Egin leku' gazteentzako musika deialdiaren irabazleetako bat da Zulaika. Azalera taldea atzean utzita, bakarlari dabil orain.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.